Paggena:'E Lluce-luce.djvu/271

'A Wikisource.
Chesta paggena è stata leggiuta.
269
Fuoco e furtuna


TRASCURZO A NA BELLA FIGLIOLA


Ma ’a quanto nun ve scrive? Tre mise? E avite tuorto.
Sapite si è ferito, si è priggiuniero o è muorto?

Ferito o priggiuniero, torna. ’Nu juorno o n’ato
torna. Senza ’nu vraccio, senza n’uocchio, malato...
Desideruso ’e pace, desideruso ’e gioia,
quanno aspetta che ghiate, currenno, a’ parta soia
cu’ doie tre purtualle pe’ farle n’aranciata,
cu’ n’uovo, n’uovo frisco, ’nu buglio ’e ciucculata...
Pe’ darle ’nu sullievo; pe’ dirle: «Fratu mio,
curaggio! D’ ’o passato fanno n’offerta a Dio.
Conta, sfoca cu’ nimico. Ma chello ch’è passato
è niente... è tutto niente, basta ca si’ turnato...».