Chesta paggena è stata leggiuta.
102
Poesie
Aggiu ’ncuntrato, cu ’na piccerella,
p’ ’a mano, comme a essa, malatella,
’a bionda. Ch’i’ tremmavo ca mureva!
Ca se n’avetta j’ ’ncopp’Arenella
pe’ via c’ ’a sera lle veneva ’a freva...
Ca me diceva: Lassame... c’aspiette?
E teneva ’na tosse, ’a puverella,
ma nun vuleva manco nu sciusciù.
Chella che lle piacevano ’e cunfiette
nun l’aggiu vista cchiù.
Aggiu ’ncuntrato tutte ’e nnammurate!
’E chiù luntane, ’e chiù luntane e antiche...
’E canuscenzie vecchie, ’e bbone amiche,
a una a una tutte ’aggiu ’ncuntrate...
Chella che me faceva chiù dispiette,
chella che me purtaie sempe p’ ’e viche,
chella che me trattaie c’ ’o scemanfù...
Chella che lle piacevano ’e cunfiette
nun l’aggiu vista cchiù...
