Divina Commedia (Napulitano)/Argomiento
Pe meza strata de la vita nosta se stenne a 35 anne de la vita. Pe la boscaglia scura se stenne lo vizio, dinto a lo quale sta menato l'ommo a chell'aità. Pe l'animale se ntenneno li tre nemmice capitale nuoste, ciovè l'avarizia, la superbia, e la lussuria, li quale non lassano che nuie potessemo saglì lo Monte de la virtù, ch'è defficele e aspro. Pe Bergileo mannato da Lucia se ntenne la dottrina datace da Dio, azzochè co lo mezzo suio canoscessemo e nce astenessemo da li vizie, e che co la bona guida soia nce metessemo ncoppa la bona via, secunno che ponno le fforze noste.
Lo Poemma sacro de Dante è no pellegrinaggio de otto iuorne, accomminciato a la fine de la Dommeneca de le Pparme e fenuto a la fine de la primma vegilia de lo Lunedì de Pasca, secunno lo rilorgio de Gierusalemme. Accommencia co lo cammino de Dante sulamente, da lo funno de lo vuosco scuro a lo monte, e doppo n'arrepuoso da lo monte a no luoco vascio de la piaggia deserta: sequeta lo cammino de Dante co Bergileo, che le comparette a miezojuorno da lo luoco vascio a la porta de San Pietro.
Lo viaggio fatto da Dante s'accomenzaie quanno fenette lo iuorno 3 abbrile Lunedì Santo de l'anno 1300, e fenette quanno se ne ieva lo iuorno 10 abbrile, Pasca de Resurrezione, se ne iette pe lo Nfierno, pe lo Priatorio e pe lo Paraviso; ma nuie potimmo dicere ca chillo fuie no viaggio pe la via de la penitenzia, pecchè Sant'Avostino dichiaraie che è la via de la penitenzia la via che passa pe lo Nfierno, lo Priatorio, e lo Paraviso, portanno da lo monte a le pporte de la cetà de Dio.
Lo viaggio de Dante tenette n'ascenzione che duraie tre ore nfino a lo Trono de Dio, co l'accompagnamiento de San Bennardo, e se trovaie a li piede de la Biata Vergene a la fine de la primma vegilia de lo iuorno 11, secunno lo rilorgio de Gierusalemme, e quanno feneva lo iuorno 10 apprile lo rilorgio de Sciorenza, potette sentì la voce de l'Angelo Rabiele lo quale allebrecava 'n Cielo a la Mamma Maria, le pparole: Ave, Maria, gratia plena, co le quale era dinto a chillo momento salutata da li devote suoie de lo popolo taliano quanno asceva lo iuorno de Pasca de lo primmo anno santo.
Che cosa è lo Nfierno de Dante?
Lo Nfierno de Dante non è autro che lo ritratto de lo Nfierno de chisto munno quanno l'abbitante suoie vanno contro a le llegge de lo Stato, accideno, arrobbano, scannano, tradisceno, e chisto è Nfierno; lo Priatorio è lo ritratto de na Monarchia iusta, pecchè è veramente Monarchia Cattoleca.
Dante dinto a lo Nfierno vò accoietà ll'ire de li popole, predecanno la Pace; dinto a lo Priatorio vò portà sti popole a la dipennenzia de le llegge de Dio e de la terra, predecanno le Birtù e la moralità; dinto a lo Paraviso li vò portà a la dipennenzia assoluta de Dio, predecanno la Fede.
Addonca Pace, Fede e Birtù songo le tre parole nfaccia a le quale s'è spicchiato Dante, e chi vo avè Pace, chi vo avè Fede, chi vo avè Virtù, à da studià chello che isso à scritto pe lo triunfo de la Religione Cattoleca nosta, ch'è la chiù bella e la cchiù cara de tutte le Religiune de lo munno.