Divina Commedia (Napulitano)/34
Lo Rre de Nfierno nnanze a nnuje compare
'Mperò, lo Masto mme dicette, ammira
Primma si lo può stare a smiccijare.
Comme quann'a no panno 'ncielo spira,
O quanno ll'aria è scura e lesto annotta,
E pare no mulino che se ggira,
Io veco no castiello da llà ssotta:
Poje pe lo viento arreto io me scostava
A lo Masto, nn'avenno n'autra grotta.
Già era e co paura nce parlava
Llà addove ogne ombra sta tutta coperta,
E trasparente ognuno s'ammostava.
Cierte corcate stanno, e cierte allerta,
Chi co la capo e chi de piede 'nchiante,
Chi ncapo e 'mpede ad arco pare 'nzerta.
Quanno fujemo llà po tanto nnante,
Ch'a lo Masto piacette d'ammostrarme
La criatura bella nfra sti schiante
Da nnanze a mme se scappa e fà restarme;
Chesta è Dite, dicette, e ccà è lo luoco
Addò commene che de forza t'arme.
Gelato addeventaje nfra chillo luoco,
N'addimmannare, ca io non lo scrivo,
Pecchè ca ogne pparlare sarria poco.
Io non morette e non restaje llà vivo:
Pe tte mo penza si tiene talento,
Ch'addeventaje d'uno e d'autro privo.
Lo Mperatore de sto regno attiento
Lo pietto aveva fora da lo jaccio,
E cchiù co no gialante io trovo abbiento,
No ggialante non fa d'isso no vraccio;
Vide mo ch'à da essere lo ttutto
Comme lo cunto ncapo già mme faccio.
Si bbello fuje comme mo è brutto,
E ccontro a lo Fattore aizaje le cciglia,
Da isso àve d'ascì qualunche lutto.
Oh comme a mme parette meraviglia,
Vedè tre ffaccia a essa a chillo monte,
Bello colore nfaccia a ddoje s'appiglia.
E ll'autre ddoje a cheste ccà agghionte
Ncopp'a lo miezo tunno d'ogne spalla,
A la capo arrivavano de fronte;
La deritta parea nfra janca e ggialla,
La mancina a vedè pareva chelle
Ggente de Nilo dinto a chella valla.
Ognuno avea da sotto doje gran scelle
Che stèvno pò a ttale animalone,
Pareano vele le cchiù llarie e bbelle.
N'aveano penne, ma de scorpione
Erano fatte e chelle sbolacchiava
E tre viente cacciava a lo focone.
Perzò Cocito tutto se jelava;
Co sseje uocchie e ire mmente isso chiagneva
E la scumma a lo chianto se mmiscava.
Li diente llà ogne vocca te rompeva
No peccatore, e doppo a sti lamiente
Llà chine de dolore tre faceva.
Chillo de nanze mozzecava a nniente
E ppò scappava, ca li rine ancora
Senza pelle restavano a sti ggente.
Chillo llà ncoppa che cchiù s'addolora
Lo Masto dice; è Giuda Scariotto,
La capo à dinto, ed à le ggamme fora.
L'autri dduje che stanno a ccapo sotto,
Uno è Brutto ed è nniro nfra sto fuosso,
E bbì comme se torce e pare cuotto;
E l'autro è Cassio ch'è addavero gruosso,
Ma la notte nce accoppa, e oramaje
S'à da partì, ca tutto è visto e smuosso.
Tanno a lo cuollo sujo io m'acchiappaje;
Isso pigliaje de tiempo e luoco poste;
Quanno le scelle aperte fujeno assaje,
Se ncammenaje pe chelle ascure coste;
E cchiano chiano pò da llà scennette
Mettenno pede a le ghielate croste.
Quanno fujemo llà lo Masto stette,
E votanno a lo ggruosso sta a ggirare
E co ffatica llà a guardà se mette,
E la capo a le zzanche sta a votare,
A lo pilo s'acchiappa pe ssaglire,
Ch'a lo Nfierno io credeva de tornare.
Statte attiento a ste scale, stace a ddire
Lo Masto 'nfaccia stanca e ppò scojeta,
Da tanto male da ccà se sta a ascire.
Pò ascette pe no fuosso de na preta,
E a mme assettato mette co ppiacere,
E doppo appriesso a mme corre e se sceta.
Ll'uocchie aizaje, e credette de vedere
Lucifero comm'io l'avea lassato,
Lle ggamme 'ncoppa lo vedea tenere.
E si io llà mme ntese pò stancato,
La ggente grossa penza che non vede
Lo punto ch'avea llà primma passato.
Sùsete mo, lo Masto dice, 'mpede,
Longa è la via e lo cammino è brutto,
E lo tiempo trascurzo nne fa fede.
Cammenajemo llà lo sito tutto
Non vedenno che ccase ncoppa e nchiano,
Sgarrupate e a la scura a lummo strutto.
Primma che da st'abbisso mm'allontano,
Io dicette aizato ste pparole:
Lo sbaglio mio tu leva chiano chiano;
Addò è lo jaccio? e chisto comme pole
Sta sotto e ncoppa? e comme! e comme maje
Da sera a ghiuorno è ghiuto già lo Sole?
E isso a mme: Tu ancora credarraje
De sta lontano mmiezo no duje mise
Addò io sto gran verme mme pigliaje?
Simmo state llà tanto quanto scise:
Io mme votaje, lo punto tu passaste
Addove da ogne pparte vanno pise,
E già sotto a lo tunno mo arrivaste
Che sta ncontrario a chillo che la secca
Ncoperchia, e addò già tu lesto guardaste,
Che nce fuje strutto l'Ommo che non pecca:
Li piede tiene ncoppa de na sfera
Che l'autra faccia fa de la Judecca.
Ccà è de matina quanno è llà de sera;
E Lucifero ccà che a nuje fa stare,
Fitto è ancora qua fitto che primma era.
Da lo Cielo cadette a chesto fare,
E la terra che ccà pò s'arapette,
D'isso 'mpaura fice ascì lo mare;
E a sto luoco da ccà tanno venette
E isso pe ffuì lassaje lo luoco
Che ccà compare e 'ncoppa pò corrette.
No luoco è llà da Barzabù de fuoco
Lontano nfì a la fossa che se stenne
Che pe ssuono è sentuta pe no poco,
Pecchè no sciummetiello llà nce scenne,
Pe no pertuso ch'isso à rosecato
A lo curzo che corre e ppoco penne.
Lo Masto e io pe llà jammo de lato
Ascenno n'autra vota nfra lo munno;
Senza ch'ognuno avesse arreposato
Saglimmo, isso llà primmo e io secunno,
E io vedette tanta cose bbelle
E lo cielo da no pertuso tunno,
Ascenno pò da llà a guardà le stelle.
FINE DELL'INFERNO