Divina Commedia (Napulitano)/18
Mala borgia è no luoco de lo Nfierno
Tutto de preta e a ffierro colorato
Comm' a lo chirchio attuorno co lo pierno.
Justo mmiezo a sto campo mmalorato
Nce sta no puzzo assaje lario e profunno,
Ch'a luoco sujo sarrà meglio guardato.
E chillo muro che rummane è tunno
Ntra lu puzzo e la ripa tosta e scura,
E diece valle tene justo nfunno.
A la quale pe guardia de le mmura
Stanno cchiù ffuosse attuorno a li castielle
Azzò la parte stace cchiù sicura,
Accossì nfra de chiste e nfra de chelle
Da chilli puoste lloro qua fortezze
A la ripa nce stanno ponticielle,
Da la roccia li scuoglie e ppiezze a ppiezze
Se moveno taglianno chilli fuosse,
Nfino a lo puzzo che ne fa arrepiezze.
A chisto luoco, doppo li spercuosse
De Gerione nce trovajemo tanno,
Lo Masto a a senistra ed io me smuosse.
A dderitta a sentì strille se stanno
Nuove tormiente e nuove frustature,
Ca chella borgia chiena chiena fanno.
Stanno 'nfunno l'annude peccature;
E nce veneano 'nfaccia, io li gguardaje,
Da llà co nuje, ma chiù currenno pure:
E comm'a li Romane, essenno assaje
Quann'è lo Giubbilejo 'ncopp' a lo ponte
Ànno a passà la gente 'ntanta guaje,
Ca da no lato tutte ànno la fronte
A lo castiello, e vanno a Santo Pieto,
Da l'autra parte vanno pe lo monte.
Da ccà, da llà, ncopp'a le pprete 'nfieto
Diavole nce stevano cornute
Che mmazzate lle devano d'arreto.
Tutte già li vedive tu fojute
A le pprimme mazzate, e pò nisciuno
Seconne e tterze non bolea sentute.
Mentre io llà jeva, ll'uocchie mieje a uno
Se scontrajeno, e tanno io lle dicette:
De vedè chisto io mo non sto diuno.
P'allicordarme io meglio lo vedette;
Co mme lo Duca se volette stare
E ditto a isso, arreto io mme facette,
E chillo tale pe non fà smicciare
Calaje la capo, llà mortifecato,
Ch'io disse: tu che staje nterra a guardare.
Si chesta faccia toja guardo io stonato,
Benedico si tu Caccianemmico?
Ma pecchè staje mo ccà tanto nguttato?
E isso à mme; pe fforza io te lo dico,
M'àje fatto no parlà chiaro a sta via
Ch'allicordà mme fà lo tiempo antico.
Io fuje chillo che la sora mia
Ghisola mme vennette a lo Marchese,
Comme diceno tutte p'ogne bìa.
E non sulo io ccà chiagno Bolognese
Anze sta borgia ccà n'è tanta chiena,
Che tanta lengue non so manco 'ntese.
A dire sipa ntra Reno e Savena;
Si de chesto vuò fede o testemmonio
De sto pietto allicordate ogne vena.
Parlanno lo sferzaje llà no demmonio
Dicenno: va vattenne, ruffiano,
Ccà femmene non stanno de sto cuonio.
Io mm'accostaje a lo Duca chiano chiano
E fatte poche passe nce trovammo
Addò no scuoglio asceva da lo cchiano.
Sagliettemo llà ncoppa addò già stammo
E votanno a dderitta pe llà nnante,
Da chell mmure aterne nce ne jammo.
De lo scuoglio arrivate a lo bacante
Da sotto, pe ddà luoco a li sferzate
Lo Duca disse: Guarda a tutte quante.
Chiste che songo state male nate,
E che tu non potiste vedè ancora
Pecchè nzieme co nuje mo so tornate.
Da lo ponte guardajemo pò allora,
E autra gente venea da l'autra banna,
Sferzata pure e dinto, e mmiezo, e ffora.
Lo buono Masto, senza mia addimmanna
Dicette: guarda chillo che mo vene,
Che lo dolore nce s'appila 'ncanna;
La fiura riale ancora tene!
Chillo è Ghiasone, accuorto nfra l'accuorte
Che se pigliaje lo Vello d'Oro 'mpene.
Pe l'isola de Lenno passaje ll'uorte
Quanno tutte le ffemmene spiatate
Li figlie lloro nne mannajeno a mmorte.
Ccà co ssegne e parole nzuccarate
Isìfele 'ngannaje la figliolella
Che primma tutte ll'autre avea 'ngannate.
Ccà prena la lassaje la poverella,
Sta corpa e sto martirio va de core,
E de Medea se fa venneta fella.
Co isso se nne va chi è ngannatore:
Avasta mo sapè de sta vallata
De tutte chille ch'ànno sto dolore.
Stevamo già addò steva 'ncrocicchiata
N'autra borgia ch'avea tre arche fatte,
E addereto teneva n'autra arcata.
Ccà sta gente che chiagne e che se sbatte
Pe l'autra borgia, e co lo musso sbruffa,
E essa stessa co le mmane vatte.
A tutte parte nc'era na gran muffa,
Pe lo fummo da vascio che saglieva
Che co ll'uocchie e lo naso facea azzuffa.
Lo funno cupo llà non se vedeva
Senza saglire nfino a 'mponta a ll'esca
Addò lo scuoglio 'ncoppa 'ncoppa steva.
Ccà venute vedettemo a mmisesca
Dinto a la mmerda tutte 'mbroscenare
Che te parea cacata fresca fresca:
E mmentre tutte io llà stongo a guardare,
Uno vedette tanto smerdiato,
Nè prèvete parea, nè secolare.
Chillo strellaje dicenno: a che guardato
Aggio essere da te cchiù che sti brutte?
E io a isso: mme so allicordato
D'averte visto co ccapille asciutte,
Si Alesio Interminejo de Lucca, e aspiette,
Perzò te guarde cchiù de l'autre tutte.
Vattennose lo fronte isso dicette:
Ccà abbascio sto p'avè la gente 'nfrisco
Mettuta, co le cchiacchiare e mmottette.
Lo Duca disse: a vedè tutto a ssisco
Fa cacciarle cchiù nnante chella faccia,
Azzò dinto guardà puoje frisco frisco.
Chi è chella scapellata gran porcaccia
Che se scippa co ll'ogne assaje mmerdose,
E se scommoglia, e a ll'erta pò s'affaccia?
È Zaida la puttana che rispose
A Ninno sujo dicenno: io aggio grazie
Granne da te? anze maravigliose.
Basta, ch'avite mo le bbiste sazie.