Divina Commedia (Napulitano)/17
Chestè la fera che co chesta coda
Passa li munte e rompe mure e arme,
Lo munno appuzza, e non se sta maje soda.
Lo Duca a mme accossì stette a parlarme,
E chella llà vicino isso chiammaje
Che s'azzeccasse nfaccia a chilli marme.
E chella porca lesto s'accostaje
E la capo cacciaje co mmiezo busto,
E la coda accossì lesto ngrifaje.
La faccia era na faccia d'ommo justo,
Tanto benegna avea fora la pelle,
E de serpente tutto l'autro fusto.
Ed erano pelose le ddoje scelle,
E lo pietto e le spalle e le ccostate
Pittate avea de nòdeche e rrotelle.
Co colore cchiù belle maje pittate
Li Tàrtare non ficero li panne,
Nè tele Aragne tanto assaje stimate.
Comme le bbarche nfra la riva stanno,
Na parte dinto a l'acqua e parte nterra,
E comme llà puorce Todische vanno
Lo castoro s'assetta e ffà na guerra;
Accossì chella fera llà se steva
Ncopp'a la preta che lo luoco nzerra.
La coda soja pe ll'aria se moveva
Venenno nnanze e ghiennose torcenno,
La ponta de scorpione essa teneva.
Lo Duca disse: Mo che sta venenno
Pigliammo n'autra via a ppoco a ppoco,
Addò sta bestia mo se sta mettenno.
Scennettemo a ddeeritta a n'autro luoco,
E diece passe schitto llà facimmo,
Pe scanzà chell'arena ch'era fuoco;
E, quanno a essa llà venute simmo,
Pe l'arena cchiù ggente jire a ccoro,
Ncopp'a lo precipizio nuje vedimmo.
Disse lo Masto: Azzò che faje trisoro
De sto girone che staje mo a vedere,
Va vide mo che fanno e chi so lloro.
E parla poco llà, si vuò sapere,
Mentre che tuorne a tutto io penzarraggio
P'arregolarme comm'è de dovere.
A lo settemo chirchio io llà viaggio
Che steva ncopp'assaje senza chiarore,
Addò la gente mesta stea a rrammaggio.
Da fora a ll'uocchie asceva lo dolore:
Da ccà, da llà stennevano le mmane,
P'allontanà l'arena e lo calore.
A la stata accossì fanno li cane,
Co la zampa e li diente, mozzecate
O da pulice, o mosche o da tavane
E appena a cierte avette io llà guardate
A li quale lo ffuoco cade e ntacca,
Nisciuno canoscette, ma attaccate
A lo cuollo d'ognuno era na sacca,
De segno e de colore comme stanno,
E ll'uocchio lloro ncoppa ccà s'attacca.
E comm'io nfra de loro vao guardanno
Vedde n'azzurro a borza gialla e bella
Che de lione mme pareva tanno;
E llà guardanno meglio, lasso chella,
Ne vedde n'autra chiù che sango rossa,
Mostannome na janca paparella.
Uno che de na scrofa azzurra e grossa
Signato avea lo sujo sacchetto janco,
Mme dicette: Che faje tu nfra sta fossa?
Mo te ne vaje pecchè campe a lo mmanco,
Sacce che lo vicino Vitagliano
Ccà venarrà nfra lo senistro scianco:
Co chisti Sciorentine io Padovano
Songo, e spisso me ntronano le rrecchie,
Strellanno: Venga chi è mo ccà sovrano,
Che portarrà la sacca co ire bbecche,
Pò la lengua da la vocca cacciaje
Comm'a lo voie che lo naso allecche,
E io, vedenno che se mbestiaje
Quanno no poco a sta m'era mettuto,
Ncopp'a li rine de chill'animale
Dicenno: sie mo forte e ngargliarduto.
E mo se scenne ccà pe cheste scale;
Saglie nnanze, ca mmiezo io voglio stare
Sì che la coda fa non pozza male.
E comm'a chillo che se sta a tremmare
A na quartana, e a ll'ogne nn'à colore
E l'ombra pò se mette isso a guardare,
Accossì deventaje co gran dolore,
Avenno scuorno llà de l'ammenacce,
Ca buon signore fa buon servitore.
Io mm'assettaje ncopp'a chelle spallacce
Volea parlà ma parlà non potette
Comm'io credette: Fa ca tu m'abbracce.
Ma isso ch'autra vota me facette
Stare auto e forte senza chiù perzone,
Stregnennome a lo pietto mme tenette.
Guè, muovete, dicette a Gerione,
Le rrote larghe, e a scennere sta poco,
Penza che puorte mo st'animalone.
Comme la varca va a ascì sta da lo luoco
Arreto arreto, se votaje le sdanche
E pò ch'a tutto se sentette a ghiuoco,
Votaje la coda mpietto pe li scianche
Che comm'anguilla nne pareva asciuta,
E s'acchiappaje pe ll'aria co le bbranche.
Cchiù paura non crede avesse avuta
Fetonte quanno fice la volata
Tanto ca 'ncielo pure s'è sentuta.
Nè quanno Icaro fice la squagliata
Ca le ppenne cadettero de cera,
Comme lo patre nce l'avea cantata,
Dicenno: fuje la mia chesta quann'era
Pe l'aria p'ogne parte e a lo momento,
Tutto vedenno fora che la fera.
Natanno se nne va, ma a lliento a lliento
Gira e po' scenne, ed io non me n'addono,
Si non quanno lle và nfaccia lo viento.
Pe la caduta d'acqua io già me stono,
Che sotto a nuje facea tale rummore
Ca lesto guardo abbascio meglio e buono.
Ma a la scesa de cchiù tremmaje sto core
Fuoco vedenno e sentenno li chiante
Ch'a la fera me stregno pe tremmore.
Sentette po' che non sentea da nante
Lo scennere e girà pe dispiacere
Che da cchiù parte cchiù nce deva schiante.
Comme farcone vola pe piacere
E senza vedè si nc'è n'auciello,
Fa ngannare porzì lo farconiere.
Scenne stanco e se move a sto rociello
Pe cciento rote, e abbascio da birbone
Ammenaccia lo Masto, poveriello!
Cossì nce mise nfunno a Gerione
A piede de la rocca auta e stagnata,
E scarrecate le noste perzone
Sparette comm'a n'anema dannata.