Divina Commedia (Napulitano)/15
Mo nce ne porta la sponna mpetrata
E lo fummo nce fà n'ombra da nante,
Ca l'acqua da lo ffuoco nn'à toccata.
Comme stace nira Bruggia e ntra Guzzante,
P'allontanà lo mare na semmana
Lo ponte che non te fà avè sti schiante;
Comm'a la Brenta, gente Padovana
Castielle e ville llà se defennette
Primma de sentì caudo Chiarentana;
Erano chille eguale, e li bbedette,
E aute non erano e nè gruosse,
E comme llà lo Masto lli ffacette,
Lontane da lo vuosco erano smuosse,
Tanto, ch'io non avria visto addove era
Si votato addereto non me fosse;
E d'aneme scontrajemo llà na schera,
Nce guardava accossì comme guardare
La luna nova cchiù te fà a la sera;
Se guardavano nfaccia chiare chiare,
E avotajeno a nuje pò llà le cciglia
Comme l'aco lo sarto sta a nfilare.
E guardato accossì da sta famiglia
Uno mme canoscette e mm'acchiappaje
Lo vestito, strellanno: è maraviglia?
E io, quanno lo vraccio a mme mmostaje
Già ll'uocchie 'nfaccia a isso avea votate
E abbrusciato comm'era lo smicciaje;
E vedette chi era a li dannate;
E co la mano nfaccia a sta scajenza
Dicette: neh, Brunetto, vuje ccà state?
E isso: Figlio mio, agge pacienza
Si Brunetto co tte mo sta parlanno;
Te torna arreto, senza commenienza,
E io: ve preco, disse, si pe n'anno
Volite co buje stongo, io ccà me resto,
Si piace a chi co mmico va viaggianno.
Figlio, dicette, sti dannate a siesto
Se fermano no poco, e pò cient'anne
Non se sciosciano maje de fuoco nfiesto.
Mperò va nnanze, appriesso a tte li panne
Terraggio, jenno pò da sta dannata
Gente che va chiagnenno chisti danne.
Io non voleva scennere la strata
Pe ghire co isso, ma co l'uocchie nterra
Jeva comm'a perzona respettata.
Isso dicette: sciorta bona o perra
Primma d'urdemo juorno ccà te porta
E chi è chisto che non te fa guerra?
Llà ncoppa, io disse, pe la vita corta
Mme sperdette pe mmiezo a na vallata
Primma de l'aità che non è storta
Ajere lle facette na votata:
Chisto mme comparette mmiezo a chella,
E la perzona mia mo ccà à portata.
E isso a mme: tu appriesso vaje a la stella,
Non può fallire a groliuso puorto,
M'addonaje de chesta vita bella;
E s'io non fosse accossì priesto muorto,
Vedenno a tte lo cielo assaje benigno,
A l'opera t'avria dato confuorto,
Ma chillo ngrato puopolo maligno,
Che scennette da Fiesole ab antico
Ed è cchiù tuosto assaje de no macigno,
Te se farrà, pe bene tujo, nemmico;
E vedarraje la nova nobirtate
E la vecchia porzì che sta co mmico.
A lu munno se chiammano cecate
Gente avara, superba, e senza core,
Statte lontano da sti sbrevognate.
La sciorta toja t'astipa chist'annore
Ca l'una e l'autra a tte pò cercarranno,
Senza sentirne manco cchiù l'addore.
De Fiesole le bbestie ccà starranno
Erba restanno senza toccà pianta,
Si mbè lo fango li ghiesse cercanno.
Addò nce stesse la semmenta santa
De li Romane che restajeno quanno
Quaglio fuje fatto de malizia tanta.
Si potesse sapè zzò ch'addimmanno.
Risponnette isso, non sarrisse ancora
Da l'umana natura puosto a banno;
Che me sta ncapo e mmo tanto m'accora,
La cara e bella fiura paterna
De vuje, quanno a lo munno a ora a ora
Me 'mpareveve l'ommo che s'aterna
E quanto me piace nfi che campo
Commene se canosca e cchiù se 'mperna.
Zzò che ddicite io tutto scrivo e stampo,
E lo stipo a na femmena pe riesto
Che lo saprà si a ghirce tengo scampo.
Tanto voglio che buje facciate a ssiesto,
Se la coscienzia mia non strilla o sgarra,
Che a la fortuna, comme vo, so llesto.
Non è nova pe mme chesta caparra
E la sciorta la rota mo girasse
E lo cafone pure co la marra.
Lo Masto se votaje senza dà passe,
E a la deritta tanno mme guardaje
Dicenno: Siente mo, e non fà tre-asse.
Nè pe tanto da meno io ccà parlaje
Co sio Brunetto, e cerca mo de truono
De li compagne suoie sapute assaje.
E isse a mme: De lloro sapè è buono,
De l'autre è meglio ccà de non parlare,
Lo tiempo sarria curto a tanto suono.
Tutte fujeno addotte 'mbuone affare,
E alletterate gruosse e assaje sacciente,
Stettero tutte uno peccato a fare,
Prisciano se nne va co chella ggente,
E Francisco d'Accurzo e pò vederve,
Si avesse avuto sto piacere a niente,
Potuto avrìa chi da lo Papa sierve
Fuje mannato da l'Arno a Baccaglione
Lassannoce li male stise nierve.
Cchiù dirria, ma mperò chisto sermone
Cchiù lluongo non pò essere, a vedere
Cchiù fummo ascire sto da lo sabbione.
Vene gente ch'a sta nn'aggio piacere:
T'arraccomanno lo Trisoro mio,
Co lo quale io mo campo, e pe dovere.
Po s'avotaje parenno a sto golio
Chi portava a Verona palio verde
Pe la campagna, e già parea dico io,
Chillo che vence, e non chillo che perde!