Canzone e Ariette nove/Ariette nove/Mutive 'e canzone...

'A Wikisource.
 EPUB   MOBI   PDF   RTF   TXT
 

[p. 68 càgna]



Mutive 'e canzone.....


Mutive ’e canzone ’e tant’anne,
     ’e tant’anne fa,
     cchiù ddoce, cchiù lente
     turnateme a mmente….
          Venite, venite… Io ve sento,
               parole, ca mo, chiano chiano,
               e ’a tanto luntano,
               turnate a stu core scuntento,
               turnate a parlà…
                    Parole d’ammore,
                         parole ’e dulore,
                         ca quase ncantato
                         rummano a sentì….

[p. 69 càgna]


Ma tu, tu ca dint’a sti vvoce,
     (’e tant’anne fa!)
     te vaie nzinuanno,
     e mmurmulianno,
     nun essere n’ombra ca passa,
          ca stenne na mano ’a luntano…
          Ma strigne sta mano
          c’ ’a toia tene strenta e nn’ ’a lassa…
          E tuorneme a di’
               parole d’ammore,
                    parole ’e dulore,
                    ca io quaso ncantato
                    starraggio a sentì….

This page was moved from . It's edit history can be viewed at Chiàcchiera:Canzone e Ariette nove/Ariette nove/Mutive 'e canzone...