Buscia!

'A Wikisource.
Jump to navigation Jump to search
EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
 
[p. 1 càgna]
BUSCIA!


Nun fuste tu ca nzino a me diciste
Te voglio bene quanto a vita mia?.....
Te si scurdata è ovè, ca m’a strigniste
dicenno: io per te moro ’e gelusia?
Chelle guardate chiene ’e passione,
nfra nu suspiro e nu vasillo doce,
m’hanno rimasta tanta mpressione
ca si nce penzo tremma pure ’a voce.

Na sera ’e luna ah! nun mà scordo maie,
stu core se squagliava pe gulio;
dì, quanto me vuo bene, te spiaie,
diciste: Quanto a chella luce ’e Dio!
Allora ’a luna ncielo te sentette,
e si se conta pare na pazzia!
passaje na nuvola e s’annascunnette,
pecchè sapeva ch’era na buscia!


GIOVANNI CAPURRO.