'A vongola

by Giovanni Capurro/Vincenzo Di Chiara

 EPUB   MOBI   PDF   RTF   TXT

 

’A VONGOLA

Dint’o vico’e Curtellare
  se diceva ’a tutte quante
  ca pe mezzo’e nu birbante…
    Che sacc i’ mo….
      ch’iva murì
      bell’accussi!
  Ma vedite che nce azzecca
  stu muri p’’a passione,
  quanno maie unu cazone
  t’è avastato, Carulì?!
      Chesta è na vongola
      quant’a na congola,
      propeta mascula
      p’’a nuvità.
      Chesta è na vera
      vongola fina,
      cchiù masculina
      nun ce po sta.


Tu p’a primma, ogne mumento,
  ive attuorno e mme sparlave,
  cu’e ghiastemme che menave:
    Ll’aggia vede
      c’adda scula,
      ll’hann’a squartà!
  E tenive sempe nfrisco
  cinco o sei fora quartiere,
  po dicive ca ’o penziere
  steva sempe ncuollo a me!
      Chesta è na vongola
      quant’a na congola,
      propeta mascula
      p’’a nuvità.
      Chesta è na vera
      vongola fina,
      cchiù masculina
      nun ce po sta.


Gennarino ’o stagnariello,
  Mezacanna e’o figlio’e Tata,
  tutte e tre t’hannu lassata;
    Pecchè cu te,
    mo simmo lla,
    neh, ch’hann’a fa?
  Si quaccuno t’addimmanna
  tuorne a fa Santa Nchiastella!
  bene mio pe sta zetella
  n’ommo buono nun ce sta?!
      Chesta è na vongola
      quant’a na congola,
      propeta mascula
      p’’a nuvità.
      Chesta è na vera
      vongola fina,
      cchiù masculina
      nun ce po sta.

G. Capurro

’A VONGOLA

Canzone per Predigrotta 1892

Versi di G. CAPURRO

⁠

Musica di V. DI CHIARA