IV.
Che buoie che ddica a chillo mazzacuogno
Che nce mette a l’ abballo, e se la sbigna;
Isso nventa la birbia, isso la ncigna,
E po quanto non l’ asce a n’ abbesuogno.
Io pe me non ce meto, e non ce scogno,
Ca lo Cecròpo a isso fa la scigna,
Che ttrov’ isso la forma pe ssa mpigna,
Pocca sujo è lo nnore, o lo sbreguogno.
Vide che ommo de mannà a lo scagno,
Che de vierze da Febo appe no cugno,
Che Cortese porzì nce farria a cagno.
Fa caudo, non se dorme, e simo a Giugno
Si non mette mo mano a sto rovagno,
Non mmereta a li baffe no cotugno.
V.
Cecròpo, si vuoie vevere a lo sicchio,
Dì chi de nuje ha cera de vozzacchio?
Pe nce chiantare bello sso cavicchio,
Ch’ a Londra aviste n’ accepe vernacchio.
Tu parle d’ Angretterra, e de Mastricchio,
Che p’ appurare nce vò no varacchio,
Comme dice lo Patre Casalicchio,
N’ asempio de Cracovia a lo Mantracchio.
Che bestia nc’ ha da fa lo cazzapocchio!
Uno che a ffa mposture è ffatto viecchio,
Ha da morì senza provà lo ruocchio.
Ma quarcosa sarrà nnanze che nvecchio,
S’ è pe n’ asileio, è pe cacciarle n’ uocchio
S’ ha da ì spierto, già me nc’ apparecchio.
