Paggena:'O luciano d"o Rre.djvu/66

'A Wikisource.
Chesta paggena è stata leggiuta du' vote e mo è fernuta.
66
’O “luciano„ d’’o Rre


47.ª


-Pecchè? dicette ’o Rre; ch’è funnarale?
-No… nient’'e chesto! Mill’anne ’e saluta!
Ma che facimmo? Pe scanzà nu male,
mettimmo ncopp’a cuotto acqua vulluta?
E ’o Rre: -Ramaglia mio, si’ n’animale!
Sta cosa ’ncapo chi te l’ha mettuta?
Nun me vuò fa’ partì? Pe chi me piglie?
Quant’'e avuto, pe darme sti cunziglie?!


48.ª

E vulette partì! Nu cuoccio tuosto,
ca ’o simmelo comm’isso, nun ce steva!
Tu l’'e chiammato? E chillo t’ha rispuosto…
Na cosa bona pure t’'a diceva!
Ma che buò fa’? pe malaurio nuosto,
quanno ncucciava, niente nce puteva!
’A pigliai storta, se mettette ’ntuono,
e vulette partì, malato e buono!