Paggena:'O luciano d"o Rre.djvu/35

'A Wikisource.
Chesta paggena è stata leggiuta du' vote e mo è fernuta.
35
’O “luciano„ d’’o Rre


16.ª


’A libbertà! Chesta Mmalora nera
ca nce ha arredutte senza pelle ’ncuolle!…
’A libbertà!.. ’Sta fàuza puntunera
ca te fa tanta cìcere e nnammuolle!…
Po’ quanno t’ha spugliato, bonasera!
Sempe ’a varca cammina e ’a fava volle,
e tu, spurpato comm’a n’uosso ’e cane,
rummane cu na vranca ’e mosche mmane!…


17.ª


’A libbertà! Mannaggia chi v’è nato!
’A chiammàsteve tanto, ca venette!
Ne songo morte gente! S’è ghiettato
a llave, ’o sango, sott’'e bbaiunette!…
Mo’, vulesse veré risuscitato
a ’o Rre ca n’'a vuleva e n’'a vulette!
E isso, ca passai pe ttraritore,
se ne facesse resatune ’e core!