41.
Fu compagno d’Attore, e sempe a lato
Le stava a le vattaglie, e le serveva
De smargiassone, e co na lanza armato
Sonava de trommetta, e commatteva.
Mà muorto Attore, se trovaje ’mpegnato
Pe compagno d’Anea, ca le pareva
A le guerre Anea sulo ommo de ciappa,
E tutte l’autre tanta magna pappa.
42.
Mà che? mentre vò fare lo sbafone.
E li marine Dei chiamma a doviello
A suono de trommetta, no Tretone
Le carcaje co no punio lo cappiello:
E co no cauce, e co no sbottorone
A mare derropaje lo poveriello,
(Si tale cosa è vera) e addove l’onna
Rompe ’ntră cierte scuoglie, lo zeffonna.
43.
Li Trojane faceano uh che sciabacco!
’Ntuorno a lo muorto, e chiu de tutte Anea
Chiagneva, e jastemmava Parasacco,
Ca la perdeta troppo le doiea.
Lo cuorpo muorto ’nforchiano a no sacco,
Pe fare quanto commannato havea
La vecchia; e pe abrusciarlo, na montagna
Fanno de legna ’n miezo a la campagna.
44.
Vanno tutte a na serva vecchia vecchia,
Recuoncolo de tigre, urze, e liune;
Chi co l’accetta, e chi có la serrecchia
L’arvole taglia da li pedecune.
E lo fracasso te stordea l’arecchia,
Che faceano cadenno a li vallune
Da coppa a chelle coste de montagne
Frassene, pigne, cercole, e castagne.