Guarracino — No, lasciamo stare le cose come stanno!
’O figlio d’’a Madonna — Hê visto ca non ce faie a ffa’ a cagno! (Pausa) ’A vita mia, oramaie, nun serve cchiú!
Guarracino — (tra sé) E mm’’a voleva da’ a mme!
’O figlio d’’a Madonna — (con accento lamentoso) Tutta na vita a soffri’! Ogne sorte[1] ’e privazione: viento, friddo, stanchezza, famma! Patenze[2] ’e tutte genere! E speravo ’e me fa’ gruosso, ’e nun suffri’ cchiú. Me so’ fatto gruosso, e mo moro[3]! (A Palomma) T’aggi’a lassa’, pe’ sempe! ’Mmiez’’e zingare, ’mmano ’O diavolone!
Palomma — No! Non ’o ddicere cchiú!
Guarracino — Tu starraie bbuono, t’’a spuse[4], e t’’a puorte.
’O figlio d’’a Madonna — E allora sperammo ca addo’ vach’io, venarraie tu pure!
Guarracino — (tra sé) S’è fissato!
’O figlio d’’a Madonna — (canta)
- Simmo zingare, carne ’e sudore;
- ogne conta, ne simmo cchiú poche
- Uno more? E lassato addo’ more!
- e ’e pperoglie se menano ’o ffooco!
Spezza la musica
(Si assopisce).
’O diavulone – (entrando s’incontra con Guarracino che fa per uscire col bicchiere della bevanda) Comme se sente? (Mostra il malato).
Guarracino — Meglio!
’O diavulone — (osserva il bicchiere, nel quale è rimasto un po’ del contenuto e chiede) E chesta è ’a bevanda ca s’ha pigliato?
Guarracino — Sì.
’O diavulone — (a cui quel liquido non convince) Addo’ l’hê accattata?
Guarracino — A nisciuna parte. È nu decotto ca ha fatto ’a mugliera vosta. Dice ca è miracoloso.
’O diavulone — E ’a cinche lire d’’o miedeco?
Guarracino — Sta ccà! (La mostra).
’O diavulone — Dammella! (La intasca).
Guarracino (tra sé) Bevanda gratis! e ll’hê trasuto pure ’o riesto![5] Peggio d’’e zingare! (S’avvia).
’O diavulone — Che hê ditto?
Guarracino — Che se mangia?
’O diavulone — ’A polenta d’aiere!
