| Zingari | 227 |
Il medico — Mo l’aggio distrutta pure! Io non aggio avuto niente, e ce aggio rimesso ’o riesto! So’ cose ’e pazze! (Si avvia, in fretta).
Zi’ Pascale— (richiamandolo) Dotto’!
Il medico — (esasperato) Jatevenne[1]! (Esce).
’O diavulone — (a ’O guaglione) Accompagnalo! (’O guaglione fa un’azione come dire: Lasciatelo perdere. ’O diavulone, agli altri) Si ’o vuliveve pava’[2] na dicina[3] ’e lire non bastavano.
Guarracino — Na dicina ’e lire? Nuie non stammo al corrente d’’e prezze, pecché nun ’e ppavammo; ma mo ’e miedece so’ sagliute[4] ’e tariffa.
Marella — E ’e ccinche[5] lire che ce ha date p’’a bevanda?
Palmira — E ’o termometro?
Guarracino — Sentite a mme: doie o tre visite ’e cheste ’o journo…
’O guaglione — (ironico)… Va ’a lemmosena[6]! (’O figlio d’’a Madonna accenna a muoversi. Palomma amorosamente si avvicina al suo capezzale e lo osserva).
Palomma — Se sceta… (Tutti gli altri si avvicinano al lettuccio premurosamente).
’O diavulone — Gennari’…
’A fattucchiara — Simmo nuie…
’A tatuata — Ce cunusce[7]?
Marella — Comme te siente?
Guarracino — Ce cunusce, sì? (’O figlio d’’a Madonna accenna di sì con un movimento della testa).
Zi’ Pascale— Che t’hê sunnato[8]?
’O figlio d’’a Madonna — Nu sacco ’e ’mbruoglie[9].
’A tatuata — (volendo spiegare il fenomeno) ’A freva[10]…
’O figlio d’’a Madonna — (fissa ad uno ad uno tutti i presenti e quasi non crede ai propri occhi nel vederli lì, amorosamente chinati su lui, tanto il suo incubo gli sembra realtà) Giesù, ma che naturalezza… (Ricordando il sogno) Mme so’ tagliato na vena… (E si guarda il polso sicuro di vedervi la cicatrice).
’O guaglione — Che vaie truvanno, ’a ferita?
’A tatuata — Tu hê fatto un’arte a smania’[11] tutt’ ’a notte.
Guarracino — Hê parlato cchiú tu ca San Pietro!
’O diavulone — E ce hê ditto nu sacco d’improperie.
’O figlio d’’a Madonna — (guardandosi intorno) Palomma addo’ sta?
Palomma — Sto ccà.
- ↑ Jatevenne: andatevene.
- ↑ pava’: pagare.
- ↑ dicina: decina.
- ↑ sagliute: saliti, aumentati.
- ↑ ccinche: cinque.
- ↑ ’a lemmosena: (a chiedere) l’elemosina.
- ↑ Ce cunusce: ci riconosci.
- ↑ sunnato: sognato.
- ↑ ’mbuoglie: imbrogli.
- ↑ ’A freva: la febbre.
- ↑ hê fatto un’arte a smania’: non hai fatto altro che smaniare (agitarti).
