Ah, sole mio cucente! Ah, sole ’e fuoco,
ca chisto core mio viene a scetà,
pàrlace tu, cu Essa, pe nu poco,
e falle capì tutt’ ’a verità!
Falle capi ch’ ’a voglio tanto bene,
ca, si vulesse vederme murì,
io lle darrìa, cu ’o sangue ’e chesti vvene,
sta vita mia, dicenno sempe: Sì!
Guarda: aggio scritto! ’O primo raggio ’e sole
m’arriva nfronte, e vene a rischiarà
tutt’ ’e penziere! Addórano ’e vviole!
È primmavera! ’O vierno nun ce sta!
Nun ce sta niente! Nc’ è l’ammore mio!
St’Ammore ca te vasa e t’accumpagna,
ca crede a te, comme credesse a Dio,
speranno tutt’ ’o vverde d’ ’a campagna!
Speranza grossa! Speranza felice!
Ajere, cu chill’uocchie ’e passione,
diciste cose ca nisciuno dice,
chiene de tenerezza e spressione!
— 94 —
