Chesta paggena è stata leggiuta du' vote e mo è fernuta.
Tu te ricuorde? ’A vocca toia, vasannome,
chiammava, mmiezo ’e vase, ’o nomme mio;
e chill’ammore me facette ndènnere
comme po’ n’ommo addeventà nu ddio!
Mo te veco ’a luntano! ’O core smania,
l’anema soffre mille vote e mille,
’a vocca tremma, ’e mmane me se torceno,
ca vonno accarezzà chilli capille!...
E tutt’ ’o sangue mio me sento vòllere
da dint’ ’e vvene, e scotta comm’ ’o ffuoco;
e stu core, furnace ’e desiderio,
ardenno se cunzuma, a poco a poco!...
Fallo pe carità; nun me fa struiere;
nun me dà cchiù tutte sti mmorte ogn’ora!
Viene addu me; viene cu me; cuntentame!
Fatte vasà, si me vuò bene ancora!
— 101 —
