Paggena:Pulicenella pulezza stivale.djvu/2

'A Wikisource.
Chesta paggena è stata leggiuta du' vote e mo è fernuta.



ATTO PRIMO


Strada con palazzina a dritta; a sinistra caffè

I. Cuosemo, Pulcinella e Matteo

Cuo. (d. d.) Scarpe e scarpini, o signori, (vien fuori dando la stessa voce) Embè, sto alluccanno ’a stammatina, e nun pozzo vennere niente. Mannaggia ’a sorta nfama, mannaggia... Seh, mo faccio proprio buono, e ca io m’arraggio che ne caccio?..

Pul. (d. d.) Polimmo, polì... (fuori dando la voce) Vih che bello lunnerì aggio accuminciato! Aggio cammenato ’e meglie strade ’e Napule, e nun aggio pulezzato nu paro ’e scarpe.

Cuo. Guè, Pulicenè, nun te lagnà, pecchè io te so’ cumpagno ’e sventura.

Pul. Allora vo dì ca siamo nati sventurati e sventurati moriremo. Però, si tu vuò, nuie putimmo rompere ’a jettatura.

Cuo. E ’e che manera?

Pul. Tu me vinne a me nu paro ’e scarpe.

Cuo. E m’ ’e pave?

Pul. Cu na pulezzata ’e scarpe.

Cuo. E na bona paliata.

Pul. Chesto po’ no... (lazzi) Ah! ca vularria sapè pecchè uno ha da tenè ’è llire cu ’a pala...

Cuo. E n’ ato diebete a muzzo. Nun è accussì?

Pul. Bravo. Hai risposto degnamente alla mia degnissima proposizione. Sei allo scritto.

Cuo. Simme arrivate a’ scola.

Pul. A proposito, Cuò, avisse visto a cliella bella purposa, guascosa e butirrosa ’e Rusinella?

Cuo. ’A ricamatrice? Ma tu overamente, c’ è miso ’o penziero? ma nc’ ’e ditto c’ ’a vuò bene?

Pul. Nun ancora; ma ti giuro ca chella cancara ’e bellezza femminile m’ha miso dint’a na furnace ’e fuoco, (lazzi)

Cuo. E tu dincelle ca sì cuotto pe’ essa.

Pul. Nun ce ’o pozzo dicere pecchè nun tengo denaro; sinò lesto lesto me l’avarria spusata.

Cuo. Sperammo che faie fortuna, e...