Paggena:Poesie napoletane - Ferdinando Russo.djvu/238

'A Wikisource.
Chesta paggena è stata leggiuta.
236
piccola borghesia


IV.


Settanta lire! E addò s'è visto mai?
Ll'acqua se paga 'a fuore, e 'o guardaporte...
Voi, gnorsì, voi! Siete nu cippo 'e guai!
Pecchè me fate sti guardate storte?

Tutte accussì, voialtri purtinai!
Mettite ll'uocchie 'a dinto a tutte 'e pporte!
Ve ne site pigliate troppo assai!
Ched'è buggìa, che biastemmate 'e morte!

'A mesata, 'a campagna, 'a bbona mana...
Robba ca sulo a Napole se vede!
Dissanguate na casa sana sana!

Meno male ca ho letto sul Mattino
na cusetta che certo piglia piede!
State frische, si mettono 'o chiavino!