Alb. Zitto, tu o vuò capì o no che io faccio veramente 1’ammore cu chesta?
Fel. Nientemeno! Fate! Fate!
Alb. (si alza) Ma dimme na cosa, pecchè dice che io sò nu nfame?
Ang. Pecchè? e me l’addimmanne pure. Dimme l’auto iuorno pecchè me faciste aspetta a la fenesta, e non te rompiste li gamme a passà? Che te credive che io era la serva toia, che me mettevo aspettà a te pe doie o tre ore?
Alb. Ca io passaie nu poco chiù tarde non lu nego, pecchè n’amico me trattenette a parlà; ma tu si overamente me vulive bene avarrisse aspettato pure na jornata, capisce, non già ca pe doie iuorne de seguito non te faie vedè a la fenesta.
Ang. Comme parie tu, aie ragione?
Alb. Sicuro.
Ang. E io aggio tuorto?
Alb. Se capisce.
Ang. Allora comme fenesce sta facenna?
Alb. lo diciarrie perdunammoce tuttte e duie e non se ne parie cchiù, che ne dice?
Ang. E che aggio da dicere, chesta è la mano mia e stammo mpace.
Alb. E chesta è la mia. Ah! mo si che so cuntento!
Ang. Mo si che so felice!
D.a Giov. Comme ve pare sta scena?
Fel. Magnifica, al naturale!
D.a Giov. Evviva chella nepota mia, tu sapive recità de chesta manera e te stive zitta zitta? D. Felì sta scena è chella che ve farrà risorgere la farsa.
Fei. Ne so certo. Appresso, signo site vuie (voi non ci state, ve ne site iute) (Ang. ed Alb. si mettono a sedere in fondo e discorrono fra loro)
D.a Giov. Bene mio è isso che vene, l’aggio visto da coppa a lu barcone, lu core me zompa mpietto. Achille, il caro Achille vene a truvà la povera Margherita.