è giusto quanno vaie vicino a Margherita, cioè la patrona toia e le dice che vuò fà ammore cu essa.
Pul. Pigliate a parte.
Fel. Pecchè.
Pul. Tu che staie dicenne, io me mette a ffà l’ammore cu la patrona! tu si pazzo! accussi vene la patrona, me fa na bona mazziata e nce ne caccia; pigliate la-parte.
Fel. Uh! che ciuccio, chelle se finge che vulive fa overo l’ammore cu la patrona.
Pulc. Io che saccio tu che staie dicenne, addonga è na bella parte la mia?
Fel. Siente a mmè, comme te steve dicenne, tu faie l’ammore cu la patrona mia (Lucia che sarà uscita un poco prima)
SCENA IV.
Luciella e detti.
Luc. Che sento tu faie l’ammore cu la patrona, Uh! assassino sbruvignato!
Pul. Tu che dice?
Luc. Che dico faccia de mpiso, faie l’ammore cu la patrona e vaie a ncuità la serva, sbruvignatone, sbruvignatone.
Fel. Ma siente....
Luc. Che sentire e sentire, nun voglio sentì niente, nun voglio sentì niente capite, fa l’ammore cu la patrona e stammatina me diceve chelle quatto parole doce, siente io nun so Luciella Pastafina si nun me venneco, quanno veno lu patrone nce dico tutto cose, e isso farrà li vennette meie, omme senza core, senza cnmpassione, me fa mettere primme la passione e po me lassa.
Pul. Ma siente lu fatto.
Luc. Che fatto e fatto....
Fel. Ma io steve dicenne....
■Luc. Vuie pure site na brutta cosa, io credo che le facite lu rucco rucco.