D.a Giov. Nun putite credere caro D. Felice io comme songo amante pe li cose de teatro. Che dicite accettate?
Fel. Io si, ma nce vonne li personaggi pe rappresentarla.
D.a Giov. Li personagge, e quante so?
Fel. Ecco quà (cava fuori la farsa) nce vonne quattro uomini e tre femmene.
D.a Giov. Li femmene nce sarriano, ma pe l’uommene... li femmene sarriano io, nepoteme e Luciella.
Pulc. Se volete n’ ommo sta ccà.
D.a Giov. Vattè tu nun saie manco che significa teatro.
Pulc. Vuie che dicite, io la vita me l’aggio passate dinte a li teatre.
D.a Giov. Tu a quà teatro si stato?
Pulc. Chille de ll’opere ’e pupe.
D.a Giov. Vattenne ciuccione. Basta tu si uno e nce ne vonno n’ati tre.
Pulc. (Uh che bella penzata pe fa saglì o nnammurate d’ ’a signurina cca ncoppe) Sentite se vulite a n’auto vo pozzo dà io.
D.a Giov. Tu! e chi è?
Pulc. N’amico mio il quale sape recità bene assai.
D.a Giov. E so duie nce vonne n’auti duie.
Pulc. N’auto è lu patrone.
D.a Giov. Vattenne chille nun ha recitato mai, e po essere ca se rifiuta.
Fel. Allora se credete la faccio io, 1’ auta parte è cosa da niente, è nu servitore che dice doie parole.
D.a Giov. Allora nce simme, primme de tutto che parte me facite fa a me?
Fel. Na bella parte.
D.a Giov. Ma, vedite ca io voglio fa l’amorosa, pecchè sempe c’ aggio recitato coi dilettanti aggio fatto sempe l’amorosa.