Paggena:Miseria e nobiltà.djvu/8

'A Wikisource.
Chesta paggena è stata leggiuta du' vote e mo è fernuta.
2
eduardo scarpetta


d'ajere. A n'ora de notte nce magnaieme nu ventre de puorco cinche perzune (gridando). I' tengo famma, i’ tengo famma!
Conc. (alzandosi). Haje ragione, figlia mia, haje ragione, tu me sparte lu core, ma che aggio da fa io puverella? Mannaggia quanno maie me jette a spusà a chillu disperatone! Me fosse rotte li gamme primme de ji ncoppa a lu municipio! Da che m’aggio spusato a isso, sto passanno nu sacco de guaje! Mò nc’à cumbinato chist’auto piattino. Steveme sule de casa, e chellu ppoco che teneveme, nce lu sparteveme a magnà nuie sule, puteveme sfucà na chiacchiera senza che nisciuno nce senteva; a maggio truvaie sti doie cammere e se vulette auni cu chill’auto disperatone de D. Felice, ma stasera la faccio fenuta, vi!
Pup. Oh! po’ sà che ve dico, mammà! Avisate a la mugliera de D. Felice che nun me ncuitasse.
Conc. Chi mugliera?
Pup. Comme chi mugliera? D.a Luisella!
Conc. Ah! già, mugliera! (Chella è la nnammurata). Pecchè, che è stato?
Pup. Aissera io steva affacciata a la fenesta, aspettanno quanno passava chillu giovinotto che va pazzo pe’ me. Tutto nzieme venette essa e se mettette ad alluccà, dicenno che nun steva bene a fa ammore da coppa a la fenesta.
Conc. Uh! teh, teh, ha fatto scrupolo D.a Luisella! E chello che fa essa sta bene? E po’ tu si’ figlia a me, haje da dà cunto sulo a me dinto a sta casa e a nisciuno chiù! (Luisella esce). Vuie vedite addò nce steva aspettato stu guaio!
Luis. Mo’ avite ditto buono D.a Concè, overo che avim-