Paggena:Lettere 'a ll'Africa.pdf/61

'A Wikisource.
Vai alla navigazione Vai alla ricerca
Chesta paggena è stata leggiuta du' vote e mo è fernuta.


'O CUNGEDATO


I.


— Gernò, gnernò, nun state a sentì 'a ggente!
Che fa? Spàrano justo comm'a nuie?
Io sò stato a Dogàle... Ero sargente,
e saccio si se more o si se fuie!


Chille spòntano primma a duie a duie,
da sotto 'e pprete!... A muzzo, a reggimente!
Apprufittano 'e tutto! E mentre vuie
jate a luvante, sguìgliano 'a punente!


Pare na vermenara, e nun fernesce!
Tutto 'o deserto, attuorno, se fa nire!
E stu nnire va nnanza, e cresce, e cresce.....


Avite voglia 'e sparà dinto 'o mmuollo!
Ne so' cadute ciente?... E che te crire?
N'ato migliaro già te zompa ncuollo!