Chesta paggena è stata leggiuta du' vote e mo è fernuta.
— Poveri figli 'e mamma! Se ne vanno
e chi sa che l'attocca, e quanta stiente!...
— Uh guarda! Mmiezo a loro, 'o si-Giuvanno!...
— Ma quante songo?... — Mille e cincuciente!
— Neh, si-Giuvà!... Buono principio r'anno!
Jate all'Assabbia appriesso 'o riggimente?
— Embè, che s'ha da fa....! — Sott' 'o cumanno?
— Surdato n'ata vota?... — È cosa 'e niente
— Uh guarda! Pure 'o frato 'e Ciampinella!...
Comme farrà, chella povera mamma?
— E comme 'a porta guappa, 'a chiancarella!
— 'E bbì lloco! 'E bbì lloco!... — E statte zitto!
Si te truvasse tu?... Stu muorto 'e famma!
Che guapparia! Ncuieta a nu cuscritto!