Ter. Jucàmmo ca non m' aggio fatto maje na schiattata de risa coram’a chesta. rassetta il posto, ed entra ridendo. Ah ah...
Jen. Jucammo ca ce vo na bella galessa pe te portà ad Àverza. rassetta, e via col lume.
Pas. E si ce manca chi te porta, te faccio io sto servizio. rassetta ma non se ne va aspettando Pulcinella.
Pul. E io porto le retene.
Fon. Ma avite fenute, avite fenute tutte quante de ridere ncopp a le spalle meje. Dimane me vedarrite Barone, e restarrite co no parmo de naso. Pas. (Oh povero pazzo!)
Fon. a Pulcinella. Viene cca tu... Li cunte nuoste po li facimmo dimane; intanto sta notte aje da ì a dormire a la cantina.
Pul. A la cantina!Fon. Si.
Pul. E perchè (
Fon. Pe spiare chello che vo fa Semmone lla dinto sta notte. Là ce stanno tanta carafocchie, annascunnete a na parte de chella, vide, siente, ma non te fa a vedè; dimane poi sacciame a dicere chello che aje visto.
Pul. (Vide lo diavolo! Justo sta notte che aveva da ì a fa colazione co Pascariello!)
quì principia un poco di pioggia.
Fon. Io vaco a fa no servrzio; tu arresedia cca ca è fatto notte, ed è venuto a chiovere, pigliate la chiave de la cantina dinto, serra buono sta porta, e vattenne, che a cca n’auto poco te so ncuollo. via.
Pul. Ee pózza essere ncuollo Masto Dorato.
quì cresce il temporale.
SCENA V.
Pascariello, e detto:
Pas. Pullecenè, simmo leste?
Pul. Aje preparato lo tutto?
