Paggena:L'Ombra.djvu/8

'A Wikisource.
Chesta paggena è stata leggiuta du' vote e mo è fernuta.
6
L’OMBRA


Chesto vo’ dicere essere femmena ’e munno. E io ne tengo l’esempio. Quanno ’a cummarella mia Cuncettella… Sapite, chella ca se spusaie a Totonno ’o guantaro… (Carolina, Assunta e Teresa assentiscono) Quanno chella pigliaie ’a quaterna ’e dudecemilia lire… n’ato ppoco lle veneva ’na cosa… M’’a vedette venì meno nnanze! Giesù! Che paura! Io trasette ca allora allora era asciuta ’a strazione… Cummà, me dicette, sapite che nummere songo asciute? — ’A vi’ ccà ’a strazione… (Volgendosi a Teresa) M’arricordo comme si fosse mo’, propeto mo’… (a tutti) 18. 37. 73. 82. 12 — A ogne nummero ca io diceva, ’a vedeva cagnà culore. Seh!… Che buo’ risponnere! Facette ’na mossa comme a dicere c’aveva pigliato, e mme cadette uno pisemo ’nterra.

Assunta — Cummà, chelle so’ mpressione troppo grosse!

Carulina — Piglià dudecemilia lire uno piezzo! ’A sotto! E se capisce! Chella cagnaie stato ’a nu mumento a n’ato! Tre milia ducate! Avess’io sta grazia!

Teresa — E pe’ cchesto una s’ha ddà sta accorta! (Ad Assunta) Assuntulè, guarda nu poco fora… Vide si veneno. (Addita Rosa) Lle dammo ’a nutizia nu poco ’a vota.

Assunta — (Si è recata sull’uscio. Guarda fuori nella via).

Rosa (lentamente staccando le parole) — So’ fforte… Niente paura! (Sulle pallide labbra ha uno scolorito sorriso)

Grazia (viene a sedersi al posto lasciato libero da Assunta) — Cummà, che saccio comme te veco! Uno ave chesta sciorta ’e suddisfazione! L’he’ visto ascì libero e franco, e te ne staie accussì?!.

Carulina (la tira pel braccio. — Piano) Zitta! Cummà, zitta! E vuie ll’arapite ’a chiaia. Chillo sempe figlio ll’era! Nu chiappo ’e mpiso, ma figlio! (Si è alzata ed è venuta avanti a Teresa) Fuie propeto ccà… (Mostra l’uscio) Che mpressione!

Teresa — Aizaie ’a mano ncuollo a mamma!

Carulina — Ma ’e mamme perdonano!

Teresa — Chella me fa venì ’na cosa int’a vocca ’o stom-