129.
Quaccosa nc’è: dimmello, Anea mio caro;
Che desgratia te mette a sto partito,
De scennere a sto regno tanto amaro,
Dove sempe lo sole è forascito?
Co sti dicome, e dissete passaro
Meza matina, e jevano ’nfenito,
Si la Sebilla no le sconcecava,
Ca già lo miezo juorno s’accostava.
130.
Essa fece ad Enea no miezo scuorno,
E le disse, mò si, ch’è frusciamento!
S’abbecina la notte, e nui lo juorno
Perdimmo co sto trivolo, e lamiento.
Non ne sia chiù, scompimimo sto taluorno.
Eccote ccà doi strate, e stamme attiento;
Chesta a li Campe Alisie, e de Prutone
Và pe deritto a lo gran cetatone.
131.
Chest’autra a mano manca pe deritto
Porta a l’abisso de la gran canaglia
Dove, chi ’n vita soa sempe sù guitto,
’N sempeterno s’abbruscia, le maje se squaglia.
Daifobo respose, oimmè, sta zitto,
Signora chella mia, e non te saglia
Cossì priesto a lo naso la mostarda:
Me n’allippo mo mò, si l’hora è tarda.
132.
Và grolia nostra và: giache li Fate
Stanno tutte pe te: de sta ventura
Saccetenne servire: e revotate
Le spalle, appalorciaje pe l’aria scura.
Subbeto Anea coll’huocchie strevellate
Se vota a mano manca, e a derettura
Vede na gran cetà tutta anticaglie,
Che tre urdene tene de muraglie.
