89.
O s’autro muodo faje da Cetarea,
(Chella, penzo, ca l’ordene, e l’ajuto
T’hà dato pe passare, o granne Anea,
Sto shiummo orrenno, dove si venuto)
Pigliame, si vuoi bene à mamma Dea,
E dintro a sso varcone arreggenuto,
Passame all’autra ripa, pe trovare
Quacche pertuso, dove arreposare.
90.
Mà la vecchia Sebilla repigliaje,
Tu stai ’mbriaco, si pe l’arma mia:
Tu, che stai senza fossa, passarraje
Sta shiomara d’Abisso e che pazzia?
Tu contra la prammateca jarraje
All’autra ripa? o figlio, arraso sia!
Suppreca quanto vuoi, ca lo destino,
Ch’è acito forte, maje se farrà vino.
91.
Mà sacce pe confuorto, ca la gente
Che te sbentraje, e le cetà vecine
Jarranno sbagottute da spaviente,
Cercanno l’ossa toe pe le marine.
La sebetura, non ne dico niente,
Sarrà de prete marmole chiù fine,
E ’ntuorno a chella ’n fì a li vastasielle
Farranno festa co li siscarielle.
92.
E pe aterna mammoria Palenuro
Chillo scuoglio sarrà sempe chiammato;
E, da chella che sò te n’assecuro,
Ca sarrà, da chi passa, sbarrettato.
E chillo le respose, affè te juro,
Ca m’hai sto core affritto conzolato.
E si lo nomme mio resta a no scuoglio,
Sarrà chisso pe me no campeduoglio.
