57.
Non primma arrivarrite a fravecare
La Cetate à sso Regno fortonato,
Che co la famme havite da pagare
Quanto v’havite ccà ciancoliato.
E tale famme, affè, v’hà d'afferrare,
Che, comme fà no sorece arraggiato,
Le tavole porzì rosecarrite.
Prode ve faccia, và: chiù ne volite?
58.
Accossì ditto subbeto pigliaje
Auto lo vuolo pe la serva ascura.
Tutto lo sango a nui se ’ntrovolaje,
E restaimo agghiajate de paura,
Pace, e perduono ogn’uno addemmannaje,
Pe scanzare accossì quacche sbentura,
A chelle, ò siano Dee, ò gran diavole,
Che arresedjano, e scopano le tavole.
59.
Subbeto Anchiso chiega le denocchie,
E no voje li Dei sacrefeccanno,
’N Cielo le mano auzaje, la voce, e l’huocchie,
E disse, ò Dei, soccurzo a tanto affanno!
Vui facite sbentare hoje a papocchie,
Quanto l’Arpie ammenacciato nc’hanno:
E non ce tocche sto crodele caso
Manco la ponta ponta de lo naso.
60.
Assarpare dapò li galiune
Fece da chillo puorto, e all’ora stessa
Fà de le vele sciogliere le fune,
E navecammo co sta cacavessa:
Fruscia lo viento ’n poppa a buonne chiune,
E fujenno accossì sempe de pressa,
Ievamo (e chesto fù lo chiù secure)
Dove volea lo viento, e Palenuro.
