53.
Mà li sierpe a Laconte se lanzaro,
Che fujea co dui figlie peccerille;
E primmo a chiste dui s’annodecaro,
Che fujevano à passe menotille.
A strillare li scure accommenzaro,
E chiammavano, Tata, co li strille:
E li sierpe accossì co doi morzelle
Ne scesero ste doi socetolelle.
54.
Corre armato Laconte, e co braura,
Pe le sarvare, sfodaraje la spata:
Se lanzaro li sierpe, e la centura
Le strenzero a dui gire annodecata.
La coda, ch’era de bona mesura
Tre canne, comme chiappo arravogliata
L’era a lo cuollo, e co le capo horrenne
Le deano ’n capo muzzeche tremenne.
55.
De mano, e piede se sbattea Laconte
Tutto zuppo de fango, e de venino;
E, jastemmanno l’arma de Caronte,
Dava strille de pazzo lo meschino.
Comme no toro, che l’è data ’n fronte
Na saglioccata, che non coglie ’n chino,
Sauta, e joca de corna a la vennetta,
Mà tanto resta pò sotta l’accetta.
56.
Muorto Laconte, chilli dui Dragune
A lo Tempio de Pallade sfilaro;
E arravoglianno a chella li tallune,
Sotta la targa soa s’ammasonaro.
Lo core nigro chiù che li cravune
Se fece a tutte, e tutte se jelaro
Pe lo spaviento de sto caso tale,
E steano co na facce de spetale.
