13.
Besogna che nce sia ccà quacche ’mbroglia:
Credere che sia vuto, io me ne rido.
Ma, bene mio, sia chello che se voglia,
E duono de li Griece? io non me fido.
Lo trademiento, che ccà s’arravoglia,
Scoprirlo co sta lanza me confido:
E, cossì ditto, taffete a la panza
Co tutta forza sbalanzaje la lanza.
14.
Tutta l’orrenna machena a la botta,
Tanto tremenna fu, se freccecaje:
Comme truono se ’ntese intro a la grotta
De lo panzone, che ne rebommaje:
E sta trappola affè se sarria rotta,
Mà lo joditio a tutte nce levaje
La mala sciorte, ca si nò starrisse,
Troja na bella, ’n pede, e regnarrisse.
15.
Ecco venire appriesto da lontano
Varie pasture, e portano legato,
Strillanno tutte co no muodo strano,
No Grieco, che stea tutto annodecato;
E se l’era isso stisso dato ’n mano,
Pe ’mbrogliare accossì chiù lo filato.
E s’havea puosto ’ncapo lo cornuto,
Tradire Troja, ò essere arrostuto.
16.
Corzero tutte viecchie, e peccerille
E gridanno, parevano cornacchie;
Le zompavano attuorno comme a grille
Co siscate, co allucche, e co vernacchie,
Faccia sta ’mbroglia sola, chiù che mille,
Canoscere li Griece pe furbacchie:
E siente addove sto negotio spara,
E da na ’mbroglia tutte l’autre ’mpara.
