Paggena:Il mastro di forgia - Raffaele Viviani - 10 commedie.djvu/41

Il mastro di forgia

425

’O sicco — Ma pecché te scartaieno pe’ suldato? pecché ire curto?

’O curto — Chi? Io so’ stato tre anne dint’ ’e curazziere! (Gli altri lo deridono con un grido all’unisono) Tre anne, comme a vivandiere.

Carluccio — Ah, mo se spiega.

Giovanni (mostrando ’O curto) — Ma insomma chillo è ’o divertimento vuosto?

’O curto — Qua’ divertimento? Io ’e mettesse ’o fierro ’n capo… (Un coro di beffa gli risponde).

Giovanni (ripiglia il canto)

M’è ccaro
stu canto ’e ferraro
ch’è amaro!
P’ ’amice^[1]?
so’ n’ommo felice,
se dice!
Cu ’o canto a martiello
starranno a penza’:
che sposo nuviello^[2]
stu masto sarrà!

’O luongo (a ’O curto) — Vicie’, hè’a fa’ assaie lloco?

’O curto — Quanno taglio sti ccannole

’O luongo —’O canteniero^[3] te vò.

Carluccio — Ha dda ave’ solde?

’O curto — Quanno maie?

’O luongo — Dice ca ha dda fa ’a sparata^[4]!

’O curto — E c’aggi’a fa’!

’O luongo — Te vo mettere a cavallo ’a votta^[5]… (Ride).

’O sicco — …comme a zi’ Bacco!

’O curto (per scagliarsi) — Mannaggia!

Giovanni (interviene, pronto) — Faticate, faticate!

’O luongo — Chillo nun è buono a ffa’ niente!

’O curto — Chi? Io ve mettesse ’o fierro ’n capo! (Altro coro di beffa).

Giovanni (ripiglia il canto)

Si sfierre^[6]?
Sì ’o masto d’ ’e fierre:
ll’attièrre.
Stu core

1. P’’amice: per gli amici.
2. nuviello: novello.
3. ’O canteniero: il vinaio; il cantiniere.
4. ’a sparata: la bravata.
5. a cavallo ’a votta: sulla botte.
6. Si sfierre: se perdi la pazienza, se scoppi.