Giovanni — ’E che?
Armida — Chella sta chiagnenno ’mmiezo ’e ggrade.
Giovanni — E chiude ’a porta.
Armida — Comme’a chiudo?
Giovanni (scattando) — E allora che vvuo’? (Le ragazze guardano un po’ sorprese) Che vvuo’ ’a me? Si io mustrasse n’attimo ’e debbulezza, sotto’ ’o pallone m’avarri’a mettere io, pe’ mme ne vula’ dint’’e nnuvole! (Le signorine sono interdette).
Agostino (ridendo, e indicando il pallone) — E chisto nun ce ’a facesse…
Carluccio — Avissev’a piglia’ n’areostato!
Armida — Ma siente…
Giovanni — Che «siente»? E ssì ttu e mme dice sta rrobba? Tu, ca mme sì ssora; tu, na femmena onesta? (Fa per soffiare, Silvana si tiene giù la gonna) ’O vì? Chisto mo songh’io! (Indica il pallone) ’O vì? ’O vì quanno me sto facenno? Ah… (Respira forte) Me sto facenno n’atu ttanto[1]! ’E vvì quanta belli piccerelle, ca me teneno p’ ’o pizzo?
Silvana — Chi ve tene p’ ’o pizzo?
Ester — ’O pizzo d’ ’o pallone.
Silvana — Ah, e spiegatevi.
Giovanni — Dincello… (Al pallone, mentre soffia) è fernuta ll’epoca ca io me stevo chiato[2]… mo m’abboffo… ’O vi comme m’abboffo? Dincello: «Mo ca tu te si sgunfiata, io me gonfiai». Va’, va’, falla cala’ ampressa… (Alla sorella) Falla calà…
Silvana (equivocando) — Ma per non calarla… vuol dire che non bolle…
Giovanni — Nun bolle, mo? Ma p’’o passato… cugna’… comme vulleva[3]…
Agostino — Eh! (Come dire: altro che! Poi, alla moglie) E va’, e chiude ’a porta: accussi ’o ccapisce, e se ne va. (Indica Giovanni, che soffia) ‘O vì, chillo comme scioscia? Tene pure ’e ssignurine attuorno e’ ’o teneno p’’o pizzo…
Armida — Ma io dicevo…
Agostino (fermo) — Va’. Io già nun saccio chillo comme sta tenenno[4]… Tu, n’ata cosa dice, chillo va fore, e passa nu guaio. E allora? sotto ’o pallone po’ me ce aggi’ a mettere io? (Armida esce).
Giovanni (al cognato) — Nu poco ’e vammace[5] e nu poco ’e petrolio. (Agostino esce).
Carluccio (ch’era alla balconata, con entusiasmo) — Neh, neh! ’A loggia ’e rimpetto[6] ne stanno menanno uno cchiù gruosso[7] ’e chisto.
Giovanni — Eh, si vulimmo fa’ a chi mena pallune cchiu gruosse, io dico ca faciarraggio pace cu muglierema!
Silvana — Ah, ma siete ammogliato?
