Armida (a malincuore, fa per andare) — E va bene…
Agostino (entra, seccato, preoccupato, e ferma la moglie. Sottovoce) — Ce simmo ’ntussecate[1] ’a festa.
Armida — Pecché?
Agostino (sempre piano) — La tua degnissima cognata… (Mostra Giovanni, che è distratto).
Armida — Che ha passato?
Agostino — Sta fore ’a porta, e vvò parla’ cu tte.
Armida (preoccupata, ma come offesa) — Cu mme? E che vvò?
Agostino — E che sa… dice ca essa è pentuta, ca nun po resistere, e vò turna’ c’’o marito. E tu t’he ’a mettere ’mmiezo p’ ’e ffa’ fa’ pace.
Armida — Io? Ma sta signora è pazza?
Agostino — Zitto. E si chillo ’a vo perduna’? ’O vi comme sta?
Armida — E ssape ca ’o marito sta cca?
Agostino — E che ssaccio. Io po’ nun aggio fernuto ’e sentere[2], appunto p’asci’[3] cca ffore e surveglia’ a Giuvanne.
Armida — P’ammore ’e Dio, se ne jesse. Si chillo ll’have dint’ ’e mmane, comme sta mo, ’a facimmo cca ffore ’a festa!
Giovanni (si volta, ai due) — Che ffanno ’e maccarune?
Agostino — …Volle, volle, cugna’!
Giovanni — Ah? e accumminciammo a pripara’ ’a tavola. (Si alza e tira avanti il tavolo, come a voler preparare il pranzo. Armida, impacciata, lo ferma).
Armida — Aspetta, Giuva’…
Agostino — Pe’ magna’ ce vò nu poco ’e tiempo.
Giovanni — Tu dice ca volle…
Agostino — Volle, ma chianu[4] chianu. Se sta ’nfucanno.
Armida — Jescetenne nu poco fore ’o grillaggio.
Giovanni — Dalle[5], afforza!
Armida (insistendo) — Mo te ce àccumpagno io.
Giovanni — Te ringrazio. Afforza mme vuo’ currompere?!
Armida (al marito) — Statte tu cca, io vaco avvede’ si se ’nfoca[6]. (Esce).
Giovanni (ad Agostino) — Ma che d’é, neh?
Agostino — Niente.
Giovanni — Hè saputo quacche ccosa ’e muglierema?
Agostino — Eh, chella chisà addo’ starrà, mo. (È in evidente agitazione).
Giovanni (lo fissa) — Si, quacche nutizia ’e muglierema hè saputo!
Agostino — Te dico ca no.
Giovanni — E giuralo pe’ quanto vuo’ bbene a ssòrema.
