Paggena:Il mastro di forgia - Raffaele Viviani - 10 commedie.djvu/29

Il mastro di forgia

413

Agostino — Finalmente! (Suono più forte di campane).

Giovanni — È passato, È passato… È stata na nuvola… Sti ccampane, ’a festa, ’o nomme suio… Carmela… (Si anima da quel suo sogno) È passato! È passatoi Carlu’! ’o vino!

Carluccio — Sta ccà.

Armida (al fratello) — Dunque, na maccarunata^[1] ce ’a facimmo?

Giovanni — Armi’, fa chello che vuo’ tu. Voglio sta’ allero^[2], va buo’?

Armida — Sì.

Giovanni — Voglio penza’ ’a saluta mia. Carlu’?

Carluccio — Princepa’?

Giovanni (dandogli un foglio da cinquanta lire) — Cheste so’ cinquanta lire. Scinne^[3], va’ m’accatte^[4] nu pallone, ’o meglio^[5] ca tene. Voglio mena’ ’o pallone, me voglio ricurda’ ’e specie antiche^[6], quanno ero guaglione e pazziavo^[7] cu ’e cumpagne.

Carluccio — Addo’ aggi’a vede’?

Agostino — Add’’o farmacista! (Come dire: sei scemo) Addu Don Alberto ’o zarellaro^[8], sta apierto.

Giovanni — Ma gruosso, ’o meglio ca tene.

Carluccio — Va bene. (Esce, seguito da Agostino).

Musica

Armida (contenta) — Oh! accussi te voglio vede’! Penza ca quanno chist’uocchie hanno chiagnute^[9], nisciuno te l’hè venuto ’asciutta’^[10]. Jesce, jesce nu poco fore ’o grillaggio. Ce stanno nu cuofeno ’e femmene. Te ne piacesse quaccuna?

Giovanni — Armi’? (Fa spallucce).

Armida — Abbasta ca te veco cuntento, te faccio pure ’a ruffiana, tanto, nun c’è scuorno^[11], ’a faccio a fratemo mio!

Giovanni — Io te ringrazio. Va’.

Armida (insiste) — E gghiesce nu poco fore ’o grillaggio.

Giovanni — No, ce sta tanta gente… Mme darriano^[12] cchiu fastidio, che altro. Va’, pienze p’’e maccarune: io m’assetto nu poco ccà ffore. Tengo chistu spettacolo ’a vascio.

1. maccarunata: allegra mangiata di maccheroni.
2. allero: allegro.
3. Scinne: scendi.
4. va’ m’accatte: vammi a comprare.
5. ’o meglio: il migliore.
6. ’e specie antiche: le abitudini di un tempo.
7. pazziavo: giocavo.
8. ’o zarellaro: il merciaio. (Cfr. Viviani, Teatro, II, p. 242, n. 27).
9. hanno chiagnute: hanno pianto.
10. ’asciutta’: ad asciugare.
11. scuorno: vergogna.
12. Mme darriano: mi darebbero.