De Malizia, de ntrighe, e miseria
È lo munno mo chino de ntutto,
Da pe tutto po regna la mmidia
E da chesta non puoje fuì.
Non c’è ammore, rispetto pe viecchie,
Se mardice, se ntacca lo tutto,
La calunnia t’arriva a li recchie,
Nè te puoje da chesta sarvà.
Tutti Donca mò tanto brutto è lo munno,
Che la morte è meglio de già?
Dor. Tu faje bene, n’aje male ncompenso,
Si uno ajute, guè male te face,
Si isso saglie ne vene ncunsenso
Che pe primmo te ave atterrà.
Mo so vecchia cadente, sciancata,
Ma vedenno corrutto lo munno,
Bramarria de stare atterrata,
Tanta nfamia pe chiù non vedè.
Tutti Viva sempe la gnora aggarbata
Che te nchiova co chisto parlà.
Celes. Evviva chella gnora, che, avite visto comme ave nchiuvato co chelle parole; non c’è che dicere li parole de li viecchie so sentenzie.
Giov. (goffamente) Non solamente li parole de li viecchie, ma pure quanno parla quacche giovinotto de talento; per esempio ogne parola mia non è....
Tutti Na ciucciaria.
Giov. Voccola popoli, moccane treje.
Tutti Ah, ah, ah. (ridono sgangheratamente)
Giov. Guè, mo redite; questo è parlare con voi altri pacchiani, capite la lengua latrina vuje? E andate un poco la sera alla scola doiecicale a dirozzarvi.
Celes. E si facite lo profitto che ave fatto isso state frische.
Giov. Già, pecchè non aggio profittato; siente, tu
