’E vestite già pesano... ’E llenzole
già nfòcano... Nun è cchiù fredda, ’nfaccia,
l’acqua, ’a matina: mo, a calore ’e sole,
scorre;... e se fa cchiù fresca;... e sguazzarià
— cu’ ’a scumma d’ o sapone —
te può,—Bellezza mia!... Già veco ’e braccia
... nun appannà ’o balcone... —
veco ’sta mano chiattulella e nfosa,
fermà cu duie fernette
’sta trezza ancora nfosa,
nera e lucente, cumm’a nu gravone...
Benedetta l’Està!..
Ca si tu me perduone
E si m’aspiette,
facimmo tale
e quale
cumm’a Pasca passata...
(Pasca rusata!...)
Te porto tanta rose e tutt’ ’e ffronne,
tu dint’ ’a st’acqua n’ata vota sfrunne....
E te ce nfunne....
E sbracciata, addurosa, e spettenata
’sta vocca ca me sfuie, ca s’annasconne,
tu te farrai vasà
comm’a Pasca passata...
(Pasca rusata!...)
Benedetta l’Està!..
