25
ATTO SECONDO
PASQUALE — Eh, io credo ch’è prossima a venì, pecchè a n’atu poco accummencia ’o cuncierto.
Gaetano — Allora mo sa che faccio? Torno a n’atu quarto d’ora; Pascà, me faje ’o piacere ’e dirle che nun è stata colpa mia, pecchè so ghiuto là cu e denare mmane, e nun n’aggio cacciato niente.
PASQUALE — Va bene, ve servo.
Gaetano — Tiene, Pascà, pigliate ’e sigari.
PASQUALE — Oh! lasciate sta...
Gaetano — Nonsignore, te l’haje da piglià, tiene (gli da un soldo e via).
PASQUALE — Grazie (poi guardando la moneta). Vi comm’è splendido! Pigliate ’e sigari, e me mette nu soldo mmano! (va in fondo e guarda) Ah! ah, ah!... Vi comm’è curiuso!... A chell’età, pretende ’e fa ’ammore. Chillo, mo che esce d’o teatro, nu colpo ’e viento ’o mena pe ll’aria!
Direttore (con orecchino in mano) — Pascà?
PASQUALE — Comandate?
Direttore — Sè truvato stu ricchino dint’’o curreturo d’’a 1ª fila, l’avetta perdere quacche signora aieressera. Si t’ ’o venene a cercà, te faje dicere comm’è fatto, e nc’’o daje.
PASQUALE — Va bene nun dubitate (prende l'orecchino).
Direttore — (alla porta delle comparse) Giovinò, facite priesto.
PASQUALE — ’O cuncierto è accumminciato?
Direttore — Mo se sta pruvanno ’a mimica, doppo se provene ’e ballabile, e all’ultimo se provene ’e scene.
Specialmente la scena dell’Inferno ch’è bella assaie, nce stanno cierti mostri cu tanta na capa!
PASQUALE — Vularria proprio vedè la scena quanno cade ’a neve.
Direttore — Ah! Chella è na bellezza (via nel palcoscenico).
PASQUALE — Vi che bello sciucquaglio, va trova chi l’ha perduto (prende la carta che à gettato Gaetano). Mettimmolo dint’a sta carta (l’ avvolge e se lo mette in tasca).
SCENA III.
Antonio e detto, poi Dorotea
Antonio (dal fondo) — Pss, pss... custode? Sapete s’è venuta la 1ª ballerina?
PASQUALE — (E chisto n’è n’ato!) Nonsignore, non è venuta ancora.
