Paggena:La Divina Commedia Napoletano Domenico Jaccarino-Nfierno.djvu/81

'A Wikisource.
Chesta paggena è stata leggiuta du' vote e mo è fernuta.
— 83 —

Da la roccia li scuoglie e ppiezze a ppiezze
Se moveno taglianno chilli fuosse,
Nfino a lo puzzo che ne fa arrepiezze.
A chisto luoco, doppo li spercuosse
De Gerione nce trovajemo tanno,
Lo Masto a a senistra ed io me smuosse.
A dderitta a sentì strille se stanno
Nuove tormiente e nuove frustature,
Ca chella borgia chiena chiena fanno.
Stanno 'nfunno l'annude peccature;
E nce veneano 'nfaccia, io li gguardaje,
Da llà co nuje, ma chiù currenno pure:
E comm'a li Romane, essenno assaje
Quann'è lo Giubbilejo 'ncopp' a lo ponte
Ànno a passà la gente 'ntanta guaje,
Ca da no lato tutte ànno la fronte
A lo castiello, e vanno a Santo Pieto,
Da l'autra parte vanno pe lo monte.
Da ccà, da llà, ncopp'a le pprete 'nfieto
Diavole nce stevano cornute
Che mmazzate lle devano d'arreto.
Tutte già li vedive tu fojute
A le pprimme mazzate, e pò nisciuno
Seconne e tterze non bolea sentute.
Mentre io llà jeva, ll'uocchie mieje a uno
Se scontrajeno, e tanno io lle dicette:
De vedè chisto io mo non sto diuno.
P'allicordarme io meglio lo vedette;
Co mme lo Duca se volette stare
E ditto a isso, arreto io mme facette,
E chillo tale pe non fà smicciare
Calaje la capo, llà mortifecato,
Ch'io disse: tu che staje nterra a guardare.
Si chesta faccia toja guardo io stonato,
Benedico si tu Caccianemmico?
Ma pecchè staje mo ccà tanto nguttato?