Paggena:La Divina Commedia Napoletano Domenico Jaccarino-Nfierno.djvu/72

— 74 —

Po s'avotaje parenno a sto golio
Chi portava a Verona palio verde
Pe la campagna, e già parea dico io,
Chillo che vence, e non chillo che perde!

CANTO SEDECESEMO ARGOMIENTO

Arrivato Dante quase a la fine de lo terzo e urdemo girone, nfradetanto che isso senteva lo rummore che faceva l'acqua de lo sciumme che cadeva dint'a l'ottavo circolo, se 'ncontra co ciert'aneme de sordate, ch'erano state nfettate da lo vizio ditto cchiù ncoppa. Pò arrivate vicino a no cavone Vergileo nce mena abbascio na funa che Dante teneva attaccata dinto a la vita, e vedeno venì natanno pe l'aria na bestia cchiù brutta de la bestialità 'mperzona.

Già steva addò senteva justo tanno
L'acqua a lo chirchio ottavo addò cadeva,
Comme ll'ape lo mmele a ffare stanno.
Tre ombre nzieme ognuna se metteva
Correnno da na torma che passava
Sotto a ll'acqua a martirio che chioveva.
Da nuje venenno ognuna nce strellava:
Scostate tu che a lo vestito pare
De la terra che nuje porzì figliava.
Che cchiaje vedette nfaccia a sti compare
Antiche e nove e chiù appicciate 'nfuoco,
Ca mme fa male si nce sto a penzare.
Se fermaje lo Masto pe no poco,
E a mme votato po' dicette: aspetta,
Cortese avimmo a essere a sto luoco;
Si non fosse lo ffuoco che saetta
De sto luoco natura, io diciarria
Che cchiù de pressa avrisse a ghì sta stretta.
Da capo accommenciajeno 'nchella via
A ddì lo stesso, e a nuje lesto arrivate
Na rota tutte e tre ficero, e bìa.