Chesta paggena è stata leggiuta du' vote e mo è fernuta.
Nun fuste tu ca nzino a me diciste
Te voglio bene quanto a vita mia?.....
Te si scurdata è ovè, ca m’a strigniste
dicenno: io per te moro ’e gelusia?
Chelle guardate chiene ’e passione,
nfra nu suspiro e nu vasillo doce,
m’hanno rimasta tanta mpressione
ca si nce penzo tremma pure ’a voce.
Na sera ’e luna ah! nun mà scordo maie,
stu core se squagliava pe gulio;
dì, quanto me vuo bene, te spiaie,
diciste: Quanto a chella luce ’e Dio!
Allora ’a luna ncielo te sentette,
e si se conta pare na pazzia!
passaje na nuvola e s’annascunnette,
pecchè sapeva ch’era na buscia!
(Proprietà letteraria)
Copyright 1902 by B. Carelli, Editore Napoli.
356
