Opere inedite di varj autori - Tomo I/Lo stampatore a li leggeture
LO STAMPATORE
A LI LEGGETURE.
LE ccose mperfette non fujeno maje bone, zoè a ddicere: Nuje avevamo de tanta belle cose de Vergilejo schitto l’Aneide sportata ’n lengua noșta, e ’n poetia de lo famuso Giancala Sitillo: nce mancava la Boccoleca, e la Georgeca: ora essenno ca no cierto Rescegnuolo d’Arcadeja ppe ssoprannome Emerisco Liceate s’ha pegliato la ncommeto de nce dà chest’avotre cchellete: ppe non fa comparè chille grann’ommo ppe lo munno, anze nfra nuje, che nne tenimmo lo Seburco, cchiù comme a uno de chille brutte Gargiubbe de la Nubbeja, cche lo Gran Se-
Segnore tene ppe sguardejane a lo Serraglio, pocca deceva Marzejale ca:::Gallo turpius est nihil Priapo.
Io mo mme dongor l’annore de ve l’appresentare talia qualia zetelle zetelle, co la verde speranza, che comme ntenno de fa ppe ttutte li vierze na cosa bona a lo pprubbeco, e ppe ttutta la gente de bon gusto co ppararele, e mmetterele mo nnante chello, che nfi a mmo l’è mancato, ccossì non me se nne voglia avè malagrazeja.
N’avotra bona: manejata de chellete; maje cchiù ppe lo nninante jute sott’a la soppressa de le stampe, zoè Soniette, Canzune, Abballate, Capitole, Sdrusciole, Ntrezzate, Ottave ec. de Cola Cuorvo, Cola Capasso, Velerdiniello, Mormile, Ciappa, Mazzarella-Farao, Serejo, e d’avotre perzonagge d’azzò, ppe ccasualetate, ma lo Cielo sa co quanto stiento avute ’n mano pocca avimmo pensato non esse de bene de farne perde la memoreja, vecco ca mo cca porzì tutte nsiemme ’n chiste duje tome accovote v’appresento. Anemateme co la bona grazeja vosta mone, e io doppo fornuto lo Dizzejonarejo Napoletano, che già stace a buono terme- termene, sì avotro non c’accorre, è lo diascance sia surdo, fuorze non mancarraggio de ve dà quarche avotra bella chelleta, da farevenne alliccà le ddeta, pocca già aggio abbistato chi la tene. Mo no stongo troppo de vena de chiacchiarejà, comme vuje fuorze manco de mme sentì, e ppecchè niente va fatto buono, quanno non se stà dommore, veniam petimusque domusque vicissim, è ppasso nnante. Da ll'avotra parte li Torcoliere, che bonno ì a lo Cafè lloro, hanno pressa, e mme sostano. Io po che aveva, e boleva dì quarcosella de l’Auture ncoppa nnommenate, nne faccio a mmeno, tanto cchiù ca già se chi songo, e non hanno abbesuogno ’n veretate mia de li ncommeje nuoste, si fama super æthera volat: addonca scompimmola, e bona notte a li sonature, ntramente mme ve arrequaquiglio.