'E piscature/Atto primo

by Raffaele Viviani

 EPUB   MOBI   PDF   RTF   TXT

ATTO PRIMO

Preludio

⁠Tela.
⁠La scena è sezionata. A sinistra, appare l’interno della baracca peschereccia di Zi’ Austino Caramiello, detto «Cient’anne», costruita da oltre un secolo, con rozze tavole. Dai vetri di un’ampia finestra della parete frontale, dalla porta comune che segue, e da una larga cancellata, aperta nella parete di destra, si scorge indistintamente l’esterno (che occupa l’altra metà del palcoscenico): l’arenile, il mare che lo lambisce a riva e l’orizzonte lontano, a notte: una ventosa notte invernale. Sull’arenile, alcune grosse barche tirate a secco; altre, pronte per essere calate in mare, sono all’estremo limite destro della scena dove s’innalza il traguardo d’un’alta scogliera. In primo piano, nella parete di sinistra della baracca, si apre una porticina che comunica con un secondo vano. Ovunque vi sono reti, nasse, funi, ceste, remi, coffe di giunco, qualche timone in disuso ed altri arnesi da pesca. Pendono dal soffitto a travate un veliero in miniatura ed un lume di bordo che inonda di povero chiarore l’ambiente. Lungo la cancellata un lettuccio di ferro, con una specie di materasso fatto di canne.

⁠Nell’interno, Zi’ Austino — un vecchietto rinsecchito e smilzo — è seduto su di una sedia a sdraio da piroscafo, accanto ad un braciere acceso. Intorno al fuoco, coi volti alla fiamma, seggono anche Pascale, detto «’O spasellaro»^[1] — un omone sui cinquant’anni — il giovane ’Ndrea detto «Temmone»^[2], dal volto affilato ed angoloso, e Gennarino, detto «Ciceniello»^[3], che è quasi un ragazzo, e che tra i due compagni che suonano l’uno un mandolino, l’altro una chitarra, va accennando a fior di labbra una canzone marinaresca. Il canto raggiunge l’esterno dove gli altri pescatori — con casacche e berretti di tela cerata — sono intenti a completare il carico degli attrezzi sulle barche, per l’imminente partenza per la pesca. Essi ogni tanto sì fermano però, come incantati dalla voce di «Ciceniello». Seduto su una scranna, al lato esterno della cancellata, v’è Cumpa’ Dummineco. È un uomo di oltre quarantanni, alto, pletorico, ma non privo di un suo fascino. Taciturno, inquieto, pensieroso, anch’egli se ne sta immobile, come in ascolto. Sul lettuccio nella baracca, dorme, semivestito, Cicciariello, col volto affondato nel cuscino.

Gennarino (canta)

Voce, sceta^[4] a Maria,

dille ’o turmiento^[5] ’e chest’anema mia:

… Chi arreposa^[6] cchiù? So’ notte chiare;

veco spunta’ ’o sole ca saglie^[7] d’ ’o mare.

Pe’ te suspira’ sta passione,

canto tutt’ ’o meglio ’e ogne canzone.

Po’, non ce ’a faccio a resta’^[8],

sento ’o bisogno ’e scappa’,

piglio ’o vuzzo^[9] e m’aggi’a^[10] alluntana’.

Quanno sto fore^[11] te cerco int’all’onne:^[12]

nun me sento cchiù ’e vuca’^[13], m’aggi’a assetta’^[14];

chiammo Maria: na Maria me risponne;

è ’a voce ’e ll’eco, Maria nun ce sta.

Tu staie ’n terra e staie durmenno

ma finge ’e sunna’^[15];

e si pure staie sentenno,

nun saie a chi va…

Io nun te dico e’ ’a voce vene a tte!

Tu pienze a n’ato, no a mme!

Dummineco (cessato il canto, si scuote e si volge agli uomini, bruscamente) — Accumminciammoce a movere^[16]! Accumminciammoce a movere, ch’è tarde! (I pescatori riprendono a lavorare con rinnovata lena, come sotto una sferza).

Cient’anne (sospira) - Eh! (A Gennarino, con la sua vocetta flebile) Jh che m’arricorda^[17] sta canzone! Chesta l’accacciaie^[18] nu marenaro.

Temmone — Nu marenaro poeta?

Cient’anne — I’ saccio^[19] chesto? Saccio sulo che appena ’a ’mmentaieno^[20], tutte quante ’a cantavano. E so’ sissant’anne, e se canta ancora! Gennarino — Sicché chesta canzone v’arricorda ’a ggiuventù? (Scherzosamente beffardo) Eh! Ma chella nun torna cchiù!

Cient’anne — ’A ggiuventù? E che me n’aggio guduto d’ ’a ggiuventù? Aggio faticato^[21] sempe. Uttantacinche anne ’e mare! (Sorpresa ammirata di Gennarino e di Temmone; ’O spasellaro sorride) E so’ na ventina ’e mise^[22] che aggio lassata ’a paranza^[23] e ca nun ghiesco cchiù ’a notte — pe’ causa ’e nepotema^[24] Cuncetta — (mostra il vano di sinistra, per alludere all’interno, dove s'immagina che dorma la donna) si no mo starrie^[25] mmiez’a ll’uommene (li indica con un gesto lento al di là della cancellata) e piscarrie^[26] ancora. (Pausa) ’A ggiuventù? ’A ggiuventù nun ’a desidero. Desidero ’o mare!

’O spasellaro — Doppo uttantacinche anne?

Cient’anne — Proprio. (I tre pescatori si guardano ammirati. A ’O spasellaro) Gué, io sa’ che saccio? Ca tanno^[27] stevo meglio ’e mo, ca mme stongo cautelato. (Nella sua voce c'è un tono ironico).

Dummineco (ch'era assorto a guardare il cielo, afferra ad un tratto ’O puzzulano^[28], che si trovava presso di lui e gli chiede con ansia mal repressa) — È caduta na stella. Porta sfurtuna?

’O puzzulano (vecchio pescatore, tipo di furbo opportunista, non sa che rispondere; poi mostrando ’O turrese ^[29], dice al padrone) — Chillo^[30], chillo sape tutto cosa.

Dummineco (si avvicina lentamente all’altro, che ha avvertito l’accenno alla sua persona, e gli chiede emozionato) — Che vvò^[31] dicere…? (’O turrese, basso e pingue, col suo faccione di fanciullo, intimidito esita a rispondere. Cumpa’ Dummineco insiste con un leggero scatto) Parla!

’O turrese (sentenzia) — Murtalità!

Dummineco (colpito, balbetta) — Murtalità? Murtalità ’e chi?

’O turrese — E chi ha visto cade’ ’a stella.

Dummineco (irritato gli dà uno spintone) — Jh! ca sì proprio nu malaurio^[32]!

’O turrese — Allora avit’a piglia’ na quaterna! va bene? (Stzzito) Che m’ ’o spiate a ffa’^[33]! (Cumpa Dummineco non risponde: s’incupisce e, a passi lenti, ritorna al suo posto. I pescatori alla spicciolata vanno allontanandosi oltre la scogliera).

’O spasellaro (al vecchio, mentre Gennarino riattizza il fuoco) — Zi’ Austi’^[34], ch’età tenite? Cient’anne — Poche. Pe’ ddi’ ca ne tengo assaie, me chiammano Cient’anne^[35]. Ma me ne mancano quatto: nuvantasei.

Temmone - E ghiettela! (Come dire: Caspita!) .

’O spasellaro — Nonsignore: chille, ’a ggente, ve chiammano Cient’anne pe’ ve fa’ ’o buonaurio^[36]: pe’ ddi’ che avit’a campa’^[37] cient’anne!

Cient’anne — E io stu buonaurio nun ’o voglio. Allora, comme dice tu, ’a n’ati qquatt’anne aggi’a muri’^[38]? Doppo, po’, te dongo^[39] fastidio, si campo n’atu ppoco?

’O spasellaro (ridendo) — No.

Cient’anne — Ah, me credevo.

Gennarino — Embè… e ve susite^[40] ’a stess’ora? ve scetate^[41] ’e notte, comme si avissev’a i’ a pisca’^[42] pure vuie? Stavete dint’ ’o lietto arrepusato^[43]!

Cient’anne (come offeso) — E già! accussi me ne faccio suonno, ’o riesto d’ ’a vita mia! (Deciso) Io aggi’a muri’ scetato! L’aggi’a vede’ quanno chiudo l’uocchie^[44].

’O spasellaro — Cient’anne ’e salute!

Cient’anne (indispettito) — E dalle^[45]! Chello ca vò Ddio! Avimm’a fa’ sempe ’a vuluntà soia! (’O spasellaro fa un gesto come dire: È giusto! Pausa. Come iniziando un racconto) ’A bunettanema^[46] d’ ’o nonno mio…

Gennarino (interrompendolo vivacemente; a Temmone) — He capito? ’A bunettanema d’ ’o nonno suio! He ’a parla’ primma d’ ’a venuta ’e Cristo!

Cient’anne — …campaie ciento e sett’anne.

Temmone — Salute!

Cient’anne — E vulette muri’ isso, pecché se magnaie^[47] ll’ostriche. Si no nun mureva.

’O spasellaro (ridendo) — Campava duicient’anne.

Cient’anne — Duiciento, no; ma n’ati duie o tre anne s’ ’e ffaceva! Teneva na salute ’e fierro! Me diceva patemo^[48] che, a chell’età, se metteva ’acchiara^[49], e arrepezzava ’a rezza^[50]!

Gennarino (a Temmone) — Belli ssalute! (Sull’arenile ricompaiono i pescatori. Qualcuno si ferma alle barche, altri vanno dal capopesca a chiedere disposizioni, altri ancora scrutano l’orizzonte). ’O spasellaro (dopo una pausa) — Zi’ Austi’, e papà vuosto^[51] a che età murette?

Cient’anne (con rammarico) — Eh… campaie niente! Nuvantaduie anne.

’O spasellaro (sorpreso) — Campaie niente?!

Gennarino (entusiasta) — Ati uommene^[52]! ati uommene, ’a ggente antica! Mo, quanno campammo assaie, murimmo a cinquant’anne!

Cient’anne — …Pecché tenite ’e vizie! (Pausa) Io me ’nzuraie^[53] a trentun’anne; e quanno me ’nzuraie, cunuscette ’o munno^[54]! Mo, bardasce^[55] a quinnice, sidice anne, nun valeno niente cchiù!

Temmone — A quinnice o sidice?

’O spasellaro — A dudice!

Gennarino — A unnice!

Cient’anne (scandalizzato) — Bella cosa! Facitevene nu vanto^[56]!

Gennarino (scherzosamente polemico) — Zi’ Austi’, ma all’epoca vosta, se tiravano ’e cazune cu ’e tterocciole^[57]!

Cient’anne (solenne) — Ma ll’uommene erano uommene!

Temmone — E mo che simmo?

Cient’anne — Site miez’uommene, pecché campate ’a mmità^[58]!

Siccetella^[59] (un pescatore magro e segaligno, dal volto scuro, come il nero della seppia — e che era tra i compagni a scrutare l’orizzonte — trasale e grida) — Cumpa’ Dummi’^[60], stanotte ’o Russo è asciuto a purpe^[61]!

Dummineco (va a guardare nel punto indicato dal pescatore; esclama, ammirato) — Che bella fiamma fa chell’acetilene!

Pilo ’e purpo^[62] (un giovane pescatore, così chiamato dai compagni per il suo dinamismo — portando le mani alla bocca, a forma d’imbuto ed allungando la voce verso il punto che attrae l’attenzione di tutti — chiama l’immaginario pescatore) — Ferdina’…

Una voce (interna, a grande distanza) — Gué… Gué…

Capitone (bel giovane, alto, slanciato, imitando il compagno) — Stanotte è festa ’e ballo! (Per dire: c’è mare grosso).

Una voce (come sopra) — Seh… seh…

’O puzzulano (anche lui gridando verso il mare) — Buona pesca! (Cumpa’ Dummineco torna al suo posto. I pescatori cominciano a raggomitolare una grossa fune).

’O spasellaro (rompendo di nuovo il silenzio, a Cient’anne) — Zi’ Austi’, ma sta barracca è robba vosta? Cient’anne — Eh… Chesta è cchiù vecchia ’e me!

Gennarino (ridendo, agli altri) — Ccà, ’a cosa cchiù giovane appassa ’o seculo!

’O spasellaro — Stammo dint’a nu museo!

Cient’anne (lentamente) — Sta barracca ’a facette ’a bunettanema ’e patemo. S’ ’a custruette cu ’e mmane soie^[63]. Le custaie^[64] vinte ducate^[65].

Temmone (a Gennarino) — He capito? Vinte ducate.

Cient’anne — Uttantacinche lire.

’O spasellaro — Mo ce vularrie miezu milione p’ ’a fa’!

Cient’anne (dopo una pausa) — Chesta, apprimma steva abbascio^[66] Santa Lucia vecchia^[67]. Nu bellu juorno, venettero cierti signure e ce ne cacciajeno, pecché facettero ’e palazze. E nuie ’a muntaiemo^[68] a Mergellina. Ccà non ce steva niente. (Tristemente) Mo, mano a mano che fravécano^[69], ce spostano sempre nu poco a gghi’ fore^[70]. ’O vi? già simmo arrivate ’n terr’arena^[71]. N’atu palazzo ch’aizano…^[72]

Gennarino -— …ve jetteno a mmare^[73]!

Cient’anne (con pacatezza ironica e dolorosa) — Eh… pecché, se mettessero appaura?

Dummineco (a Siccetella, con lieve ironia) - Va’ vide^[74], va’ vide si ’o signurino ’e figliastemo^[75] s’è susuto^[76].

’O turrese (dopo aver guardato attraverso la calcellata) — No.

Siccetella — ’O sceto^[77]?

Dummineco (esita un attimo) — Lassa sta’^[78]. Mo ’o chiammo io. Pe’ chillo ce vonno ’e mode gentile. (La sua ironia si muta in rabbia) L’aggi’a tira’ ’a copp’ ’o lietto ’n terra; e nu cato^[79] d’acqua ’n faccia! (Ma non osa attuare il suo proposito, e si allontana verso il mare, mentre i due pescatori commentano in sordina le sue parole).

’O spasellaro (a Gennarino, mostrandogli il vecchio) — Tu mo, ’o vi^[80]? Lievelo^[81] ’a dint’ a sta barracca, ’o faie muri’! Cient’anne — E se capisce! Io ccà so’ nato: ’a cammarella^[82] ’e dinto; ccà me ’nzuraie io; e ccà facette ’nzura’ a nepoteme Vicienzo…^[83]

Gennarino (per toccarlo nel vivo) — E mo ce dorme cumpa’ Dummineco!

Cient’anne (a quel nome, la sua persona è scossa da un tremito rabbioso) — Embè! (Come dire: che ci vuoi fare?) …E pecché ’a barracca è robba mia, io stongo ancora cca! Si no, cumpa’ Dummineco (nel dire il nome lo deforma, con astiosa ironia) me n’avarrie^[84] pure cacciato. E, ’a vicchiaia, avarrie fatto ridere ’a ggente ’ncopp’ ’e spalle meie!

Temmone (a ’O spasellaro, con viva curiosità) — Ma’a Sie’ Cuncetta (e mostra il vano di sinistra) era ’a mugliera d’ ’o nepote ’e Cient’anne?

’O spasellaro — Sí. E ’o nepote ’e Cient’anne era ’o padrone. Po’, isso murette e lassaie^[85] ’a mugliera vedova cu duie figlie.

Gennarino — Cicciariello e Catarina.

’O spasellaro (ridendo) — Catarina, ’a passione ’e chisto! (E da uno scappellotto a Gennarino che si schermisce; poi continuando la sua spiegazione) …E ’a Sie’ Cuncetta se spusaie a cumpa’ Dummineco, ca pure era vidovo. Ma, contro ’a vuluntà d’ ’o viecchio, ca nun ce pò penza’^[86].

Temmone (riepilogando) — Vene a dicere ca Catarina e Cicciariello a Cient’anne le veneno a essere…^[87]

Gennarino — Pronipoti carnali.

’O spasellaro — Figlie d’ ’o figlio d’ ’o figlio.

Temmone — Mamma mia!

’O spasellaro — Eh! e chesto è niente! Zi’ Austino vedarrà pure ’e prostranipote! Quatto generazione!

Temmone — Che bella cosa!

Dummineco (avvicinandosi a ’O turrese) — Che ore sarranno?

’O turrese (dopo aver guardato il cielo) — Passate ’e ccinche!

Cient’anne (borbottando) — Cuncetta nun me l’avev’a da’ stu dispiacere ’e ffa’ trasi’^[88] n’at’ommo dint’ ’a casa! Vriogna^[89]! … Doppo manco cinche anne ch’è muorto ’o marito, se ’mmarita^[90] n’ata vota! Chesta che purcaria^[91] è! ’O marito essa ’o teneva; e no pecché m’era nepote, era nu santo! Ddio te l’ha voluto leva’? E basta! Pare quase comme si uno se vulesse ribella’ ’a vulunta ’e Ddio! Ah, tu mme lieve^[92] a chisto? E io mme ne piglio a n’ato! Gennarino - Zi’ Austi’, ma vuie nun v’avit’a scurda’^[93] ca ’a Sie’ Cuncetta rummanette^[94] vedova figliola… Chella, è mo, e se pò dicere ca è ancora na bella femmena!

Cient’anne (investendolo) — E che vò dicere? Teneva duie figlie gruosse…^[95] Che n’avev’a fa’. Che lle mancava a essa?

’O spasellaro (timidamente) — E se vede ca quacche cosa lle mancava, si no nun se turnava a ’mmareta’^[96]!

Cient’anne (severo) - No! no! pe’ rispetto ’a buonanima, pe’ rispetto a mme, nun l’avev’a fa’. (Fuori i pescatori calano a mare la prima barca, accompagnando lo sforzo con le voci).

I pescatori — Oh! tira! Oh! venga!

Cient’anne — …E fosse cuntenta almeno! Addo’! Nun ce sta juorno ca nun fanno storie! ’O padrigno nun pò vede’ ’o figliasto; ’o figliasto nun pò vede’ ’o padrigno… e tu, mamma, ca vide sta robba, te dispiace?! Ma tu, chesto, l’aviv'a capi’!

Dummineco (che era apparso sotto la porta della baracca, in silenzio; al vecchio, gelido) — Che staie murmurianno^[97] tu?

Cient’anne (colpito, ripete) — … Tu?! (Gennarino, ’O spasellaro e Temmone si chinano sul braciere, per timore d’essere ripresi dal capopesca).

Dummineco (che nel frattempo aveva preso alcune ceste per portarle fuori, ai tre, con sarcasmo) — E vuie ve site mise vicino ’o ffuoco? (’O spasellaro vorrebbe giustificarsi, ma cumpa’ Dummineco taglia netto) Jammo, ca stanno calanno ’e vvarche a mmare^[98]! (I tre si levano sgranchiendosi le membra, mentre îl capopesca, guardando con malcelato disprezzo il figliastro che dorme, lo scuote bruscamente) Gué! scetate ca è gghiuorno^[99]! (Esce, biascicando) Po’ dice ca io so’… (Cicciariello, ancora addormentato, dà uno spintone a Temmone, credendo che sia stato lui a volerlo svegliare).

Cient’anne (rimuginando l’offesa patita) — A n’ommo ’e nuvantasei anne: Tu! Jh che bell’ebbeca^[100]! S’è perduto ’o rispetto! (Ai tre pescatori, con altro tono) Scetàte, scetàte a Cicciariello. Si no ’o padrigno trase, ’o trova ancora a durmi’ e accummencia a spusta’…

’O spasellaro (dopo essersi assicurato che cumpa’ Dummineco non lo ascolta, intento com'è a guardare il mare) — Si… ma cumpa’ Dummineco se stesse attiento, però… Cicciariello, apprimma^[101], ’e scoppole^[102] s' ’e tteneva, mo nun s’’e tene cchiù! Aiere^[103], quanno avette ’o schiaffo, addeventaie^[104] nu lione! Quatto ’e nuie nun ’o putevamo mantene’! Cient’anne — E pirciò evitammo: scetàtelo!

I pescatori (fuori di scena) — Oh! tira! Oh! venga!

Temmone (a Gennarino) — Ma me saie dicere pecché nun vanno d’accordo figliaste e padrigno?

Gennarino (come dirgli: Set così fesso che non lo sai?) — Quanno mai padrigne e figliaste so’ gghiute d’accordo?

’O spasellaro — E dire ca putarrieno^[105] sta’ ’n grazia ’e Ddio! Ma ’o vi? è na varca scassata^[106]!(I pescatori tornano in iscena e si accingono a calare a mare la seconda barca)

I pescatori — Oh! tira! Oh! venga!

Pilo ’e purpo (ad un tratto si ferma, e rivolto a Siccetella, esclama irritato) - Neh! e chiammate^[107] a chilli llà! (Mostra i tre compagni che sono nella baracca).

Siccetella (sulla soglia della baracca) — Gué! e venitece a dda’ na mano!

Capitone (che con ’O turrese ha seguito Siccetella; mostrando i tre, con ironia) — Quanto so’ belle: se ne stanno vicino ’o ffuoco!

’O turrese (mentre i tre si accingono ad uscire) — Ve site scarfate^[108]? (Maligno) E mo che ascite, pigliate na doppia pulmunite chiusa!

Gennarino (facendo scongiuri ed avviandosi sull’arenile) — Va’ fila! Va’ fila! Cevetta^[109]!

’O spasellaro (seguendo Gennarino, a ’O turrese) — Te se pozza secca’ ’a lengua^[110]!

Temmone (scuote il dormiente) — Cicciarie’, scétate! (Ed esce).

Dummineco (al passaggio dei tre pescatori si toglie il berretto e li saluta con tono canzonatorio) — Si ce vulite fa’ l’onore… (I tre balbettano qualche parola di scusa e si uniscono al gruppo dei compagni attorno alla barca, che viene calata in mavre).

I pescatori — Oh! tira! Oh! venga!

Cient’anne (dopo un attimo di pausa, toccando con la punta del suo bastoncello il corpo del nipote) — Cicciarie’! Cicciarie’!

Catarina (entra da sinistra, indossando ancora la camicia da notte e con i piedi nudi. È una ragazza bruna, gh occhi neri, di una sana, prorompente sensualità. Con istintivo senso di pudore raccatta da una sedia che è prossima alla porta un camice stinto e rapidamente lo indossa. Quindi, avvicinandosi al vecchio, lo saluta con affettuosa deferenza) – Nono’^[111].

Cient’anne — Gué, sceta a frateto^[112]. Patrìeto^[113] l’ha chiammato già na vota. Tu ’o ssaie^[114], chillo è n’animale; e accumminciammo ’e notte, a ffa’ storie. (Pausa) Mammeta dorme ancora? Catarina — Sí.

Cient’anne (mostrando cumpa’ Dummineco, che ora è fermo presso la cancellata esterna, assorto nei suoi pensieri) — È scarfancella^[115] tu, na tazzulella^[116] ’e cafè a patrìeto. (Catarina approva) E sceta a chillo. (Mostra Cicciariello) Nun m’ ’o facite senti’! (Allude a cumpa’Dummineco).

Catarina (si avvicina al lettuccio e con voce dolce) — Cicciarie’… Cicciarie’ scetate ca è tarde.

I pescatori (fuori dalla scena) — On! tira! Oh! venga!

Catarina (a Cicciariello, che mostra di non volersi svegliare) — Meh, ’e ssiente^[117]? Già stanno mettenno ’e vvarche a mmare.

Cicciariello (col tono di voler dire: lasciami stare) — È fanc’ ’e mmettere^[118] apprimma e po’ me chiamme! (Si gira dall’altra parte).

Cient’anne — Viestete^[119]! Viestete! Ca patrìeto t’ha chiammato n’ata vota.

Cicciariello (balza dal lettuccio. È un giovane bruno, riccioluto, vivacissimo. Ha una maglietta e un paio di mutandoni con i legacci. Si avvicina festosamente al vecchio e lo bacia, esclamando) — Gué, ’o nonno d’ ’o nonno mio, buongiorno!

Catarina (si affretta a preparare i panni del fratello).

Cient’anne (a lei) — Lassa lloco^[120]. Chillo mo se veste isso. Scarfa ’o ccafè a patrìeto.

Cicciariello (con una smorfia) — Patrìemo? Patrìemo vò dicere quase pato^[121]. E chillo m’è quase pato? Chillo è nu pescecane. Quanno sparte^[122], se mangia tutto cosa isso. (Con dispetto) Io, stanotte, a mmare nun ce vogl’i’^[123]. (Getta via i panni che Catarina gli aveva porto e torna a buttarsi sul lettuccio).

Catarina (irritata) — Ma che ssì ppazzo? Viestete! Nun perdere tiempo. (Raccatta i panni e li porge al fratello che non li accetta).

Cicciariello — E che guadagno? Fatico^[124] sempe e nun me pozzo fa’ maie nu paro^[125] ’e scarpe. Aiere, dummeneca, avett’a asci’^[126] e’ ’o vestito nuovo, scavezo e scaruso^[127]. (Con disappunto e rabbia) È invece ’e ggiuvene ca stanno ’mbarcate cu nnuie: scarpe, cammise culurate, cappielle, pagliette.

I pescatori (fuori dalla scena) — Oh! tira! Oh! venga!

Cient’anne (con un sospiro) — E nun ’mporta! Accuntentalo n’atu ppucurillo^[128]. (Allude a cumpa’ Dummineco). Catarina — Meh, chillo mo trase, fatte truva’ vestuto. (Gli porge i pantaloni).

Cicciariello — Aspetta! che, mme mangia?!

Catarina — Aggiu^[129] pacienza, fratu mio. Meh, si no chillo vene, allucca^[130] e ’o nonno nun se fida d’ ’o sentere.

Cicciariello (con mala grazia, cede) — Miette ccà! (Catarina va a prendere una caffettiera e la mette sul fuoco, mentre i pescatori tornano in scena e si accingono a calare in mare una terza barca).

Musica

I pescatori Oh! tira! Oh! venga!
⁠⁠Oh! tira! Oh! venga!

Cicciariello (cominciando lentamente a vestirsi, canticchia)
⁠ ’E vuzze d’ ’o ssicco^[131], cu ll’uommene attuorno,
⁠cu «Oh! tira!» e cu «Oh! venga!» se scenneno^[132] a mmare.

I pescatori Oh! tira! Oh! venga!

Cicciariello ⁠Se forma ’a paranza, va fore e scumpare.
⁠ A buordo^[133], sultanto, se danno ’o buongiorno.

I pescatori { Oh! tira! Oh! venga!

Cicciariello ⁠Se ’ncrociano ’e vvoce, purtate d’ o viento;
⁠ vuganno^[134], che ppace! Chi fuma, chi penza.
⁠ ’A luna fa a prora nu triemmolo^[135] ’argiento.
⁠ A poppa, ’o guaglione^[136], se spassa^[137] cu ’a lenza.
⁠ Se parlano chiano^[138], ma ’o sciato^[139] risona.
⁠ Nu rimmo^[140], ogne tanto, se ferma stracquato^[141].

I pescatori Oh! tira! Oh! venga!

Cicciariello Se ferma chi penz’ a na bella guagliona,
⁠chi tene nu figlio luntano, ’mbarcato.
⁠Ritornano all’alba, cu ’o suonno pesante,
⁠cu e panne ’nzuppate^[142] pe’ ll’ummedità^[143]. I pescatori Oh! tira! Oh! venga!

Cicciariello «Cu ’a rezza, stanotte, s’è gghiuto a vvacante^[144]!
⁠Mettimmela ’o sole, pe’ farla asciutta’^[145]!»
⁠’E vuzze d’ ’o ssicco, cu ll’uommene attuorno,
⁠cu «Oh! tira!» e cu «Oh! venga!» se scenneno a mmare!

I pescatori Oh! tira! Oh! venga!
⁠Oh! tira! Oh! venga!

Spezza la musica

Dummineco (che aveva seguito il calo della terza barca, ora viene dal mare ed entra nella baracca infuriato, con l’intenzione prefissa di redarguire Cicciariello) — Chisto ancora s’ha dda…? (E scorgendo Cicciariello già vestito) Ah!

Cicciariello (sardonico) — Stiamo sosuti^[146]! (Mostra il piede nudo) Mm’aggi’a allustri’^[147] sulamente ’e stivalette ’e pelle ’e pede^[148]!

Dummineco (ha capito che la botta va a lui — Sì gghiuto sempe scavezo!

Cicciariello — ’Mmano a vvuie, si’^[149]!

Cient’ anne — ’Mmano ’o pato, no.

Cicciariello — ’Mmano a papà, cammenavo cu diciassette pare^[150] ’e scarpe.

Dummineco (guarda male Cicciariello e poi Cient’anne) — State accurdate buono, tutte ’e dduie. (Al figliastro) Io nun sapevo ca, pe’ me spusa’ a mammeta, m’avev’a mettere a ffa’ ’o scarparo^[151]. (Pausa) Jh, quanta difiette^[152]!

Cicciariello (al vecchio) — E scarpe m’ ’e chiamma difiette! Nun me voglio leva’ ’o vizio ’e i’ cu ’e scarpe ’o pede.

Catarina (al fratello, supplichevole) — Zitto, ca dorme mammà.

Siccetella (viene dal mare ed entra nella baracca per prendere una coppia di remi; ma in un angolo, in fondo, ne trova uno solo e cerca l'altro).

Dummineco (guarda un attimo Catarina, st rabbonisce e si volge quindi al figliastro con tono di scherzosa minaccia) — Fa’ ’o capuzziello^[153], tu! Fa’ ’o capuzziello! Va a ferni’^[154] cà na matina ’e chesta, vaco a mmare e te lasso ’n terra!

Cicciariello (fa una smorfia ironica) — Ah! E vvuie, cu n’ato colpo ’e chisto, me facite muri’!

Siccetella (a cumpa’ Dummineco, che vorrebbe rispondere ancora al figliastro) — Padro’, cca ce manca nu rimmo. Dummineco — Vide llà, ca a mmare ha dda sta’. (Siccetella mette il remo sulla spalla ed esce, dirigendosi oltre la scogliera. Il capopesca si volge a Catarina e, senza guardarla, le dice con dolcezza) È fatto ’o ccafè?

Catarina (semplicemente) — Mo l’aggio miso a ffa’.

Dummineco — Abbasta pe’ ne da’ na tazzulella pure a ll’uommene?

Catarina — E… nun ce basta, songo assaie. (Allude ai pescatori) .

Dummineco — Quante so’? Sette, otto perzune^[155]?

Cicciariello — Embè, sette, otto so’ lloro; e cu nnuie…? (Con intenzione canzonatoria, prende la caffettiera e ne osserva il contenuto) Avarriano asci’ ’a cca’^[156], nu tridece tazze? (Pone la caffettiera in una posizione inclinata ed appare evidente come il caffe sia scarsissimo. Cumpa’ Dummineco torna a guardare fuori, fermo alla porta della baracca, con le spalle rivolte al figliastro: il quale, preso da una subitanea idea balzana, rimette la caffettiera sul fuoco e la riempie con dell’acqua che era in una bottiglia, presso il lettuccio) .

Cient’anne (esterrefatto) — Guè!

Catarina — Che ffaie?

Cicciariello (a bassa voce) — Va buo’… ’o ccafè vene nu poco lasculillo^[157]. Nun fa male ’e nierve^[158].

Dummineco (allungando la voce, come per parlare a Siccetella) — Guè, he truvato ’o rimmo?

Siccetella (dal mare) — No, no!

Dummineco (a Cicciariello) — Va’ vide tu, che llà ha dda sta’. Portate sti cchianelle^[159]. (Cicciariello prende una pila di ceste che l'altro gli indica ed esce sull’arenile, dove trova gli uomini che frattanto, alla spicciolata, son venuti dal mare. Tutti, tranne ’O turrese e ’O puzzulano e Gennarino).

I pescatori (circondano festosamente il giovane) — Buongiorno, Cicciarie’!

Cicciariello — Buongiorno. (Ironicamente) Ched è, neh? A chest’ora ve susite?

’O spasellaro — Jh chi parla!

Cient’anne (superando le difficolta dell’età, si è alzato ed è uscito anche lui sull’arenile) .

Cicciariello (agli uomini) — Jammo^[160]! Ca stammatina patrìemo se mette in cerimonie: offre ’o ccafè.

I pescatori (sorpresi) — Overo? E comme va, neh?

Cicciariello (sornione) — Na tazzulella carreca^[161]. Fatta fresca cu ’a macchina espressa!

Cient’anne (ridendo, suo malgrado) — Ma che guaglione!

Cicciariello — V’avit’a movere, pero! Pilo ’e purpo (mostrandola) — E chesta è l’ultima varca!

Cient’ anne (scherzosamente) — Jammo! ca mo ve dongo^[162] na mano pur’io!

I pescatori — Eh! (come dire: Che enormità!).

’O spasellaro — …Na mano non ce ’a po dda’ cchiu, ma nu cunziglio^[163] sempe!

Capitone — Chesto sí!

Siccetella — Pe’ nu cunziglio, ce levammo sempe ’o cappiello! (Dal mare giunge la voce di Gennarino, che canta la sua canzone marinaresca. I pescatori si mettono in ascolto; compiaciuti, ammirati. Frattanto)

Dummineco (ch’era rimasto sulla soglia della baracca, alle prime note del canto trasale e guarda Catarina, sempre china di braciere. È commosso, turbato; s’avvicina alla ragazza e le chiede con voce incolore) — Mammeta dorme ancora?

Catarina — Sí.

Dummineco (esita un istante, poi, con uno scatto fulmineo, impetuoso, afferra la testa di Catarina e bacia la figliastra sulla bocca).

Catarina (si libera dalla stretta del maschio, sconvolta, eccitata, stizzita) — …Io ce’o ddico a mamma!

Dummineco (fuori di sè) — Zitta…

Catarina — Vuie ll’avit’a ferni’^[164]!

Dummineco (accostandosi a lei e tremando tutto) — Viene ccà, siente.

Catarina — Ma che vvulite?

Dummineco — E che ssaccio^[165]… Nun vulevo credere a me stesso, ma io te voglio bbene…

Catarina (pigliando il senso buono della frase) — Giesù, io pure a vvuie… Mme site padrigno…

Dummineco — Ma io nun te voglio bbene comm’a figliasta… Io voglio bbene a tte, a Catarina!

Catarina (impressionatissima) — Vuie site pazzo!

Dummineco — E che ssaccio… chiammala na malatia… Ma io te veco e tremmo, te penzo e te desidero.

Catarina — Uh, Giesucristo mio, dalle ’e lume! Vuie site ’o marito ’e mammà!

Dummineco — E ca fosse pure pateto carnale… Non songo io che parlo: è sta freva^[166], sta freva ca nun me fa raggiuna’ cchiu!

Catarina — Chisto è nu sacrilegio!

Dummineco — E che mme dice a mme? Comme si putesse riflettere; comme si mme putesse frena’… Era destino! T’aggio ditto maie niente? No! E so’ dduie anne ca te vaco scanzanno^[167]; so’ dduie anne che aggio penzato cu paura a chello ca mo sta pe’ succedere. E cchiù aggio scanzato ’o penziero, cchiù ’o penziero m’ha ’nchiuvato^[168]! Aggio luttato pe’ dduie anne! Aggio ditto a me stesso: no! e ’o desiderio sempe cchiù forte, sempe cchiù prepotente m’ha ditto: si! E m’ha levata ’a ragione, e ’a forza ’e resistere. Mo non ce ’a faccio cchiu! (Si abbatte sul lettuccio).

Catarina (allibita) — E chisto è ’o bbene ca vulite a mammà?

Dummineco — ’A vicinanza… ’a vicinanza cuntinua… Te veco troppo spisso, mme te trovo sempe ’nnanze. ’A barracca è nu muorzo^[169], simmo troppo assaie ccà dinto e nun ce putimmo movere… Io me scanzo^[170] e te tozzo^[171]; jesco fore e te sento; chiudo ll’uocchie e te veco; vaco a mmare e te penzo… Ritorno, e te torno a vvede’! Sì n’ossesso pe’ mme… sì n’ossesso! (Pausa) M’hè sentuto stanotte?

Catarina (lo guarda intontita) — V’aggiu ’ntiso.^[172] (Si china al braciere, mentre cumpa’ Dummineco ritorna alla soglia della baracca. Dal mare tornano ’O turrese e Gennarino che termina l’acuto della sua canzone fra gli uomini).

’O spasellaro — E nun te miette a ffa’ ’o palummaro^[173]? Tiene chistu sciato^[174]!

’O turrese (mostrando l’ultima barca) — S’ha dda cala’^[175] a mmare, sta varca?

’O spasellaro — Aspetta, ca mo cumpa’ Dummineco ce offre ’o ccafè.

Cicciariello — Proprio.

’O turrese (sorpreso) — Ah, pe’ chesto s’è guastato ’o tiempo?

Pilo ’e purpo ( guardando verso il mare) — Overo, sah: stanotte se balla.

Cient’ anne — È bunaccia!^[176] È bunaccia! Mettite ’a prora ’o mare e ascite a nnomme ’e Sant’Antonio^[177].

’O turrese — Caspita! È bunaccia? (Mostrando il mare) Nun ’e vvedite ’e cavallune^[178]?

Cient’ anne — Mm’ ’e chiamme cavallune!

’O turrese — E che sso’? Pecurelle?

Cicciariello (al vecchio) — ’O no’, chisto è marenaro d’acqua minerale! L’avit’a mettere a pisca’ dint’ ’a vasca ’e ll’acquario…

’O turrese — Pecché, che vvuo’ dicere tu?

Cicciariello (scattando) — E m’ ’o chiamme mare, chisto? Pe’ nu poco ’e punente frisco, ddoie macchie ’e viento… Dico buono io, ca non saie piglia’ manco l’alice in buatta!^[179]

’O turrese — Embè, io mo che t’aggi ’a risponnere?

Cicciariello — E ’mparete primma ’e nata’^[180] e po’ arape ’a vocca^[181]!

Siccetella — Pecché, nun sape manco nata’?

Cicciariello — Addo’? Nata accussi… (Accenna con mimica analoga) comme ’e cacciuttielle^[182]… (I pescatori ridono, sfottendo ’O turrese) .

’O spasellaro (a lui) — Cumpa’, pe’ nu marenaro è proprio nu scuorno^[183]!

’O turrese (giustificandosi) — Neh, ma guardate: io so’ curto e chiatto^[184]…

Cicciariello — E cu dduie centesime ’e coscie.

’O turrese — Io faccio o bargio^[185]: me riposo. E po’ aggi’a nata accussi… (Mimica analoga) si no nun cammino: addo’ mme mengo, llà resto. ’O bello ’e Ddio ca nun affogo manco, pe’ vvia d’ ’a panza^[186].

Capitone — L’hann’a rimurchia’^[187]…

Pilo ’e purpo — …si no resta ancurato ’mmiez’ ’o mare!

Gennarino — Ma ched è, na boa?

Siccetella — Eh, na boa! (Gl altri ridono).

Catarina (con voce dolce a cumpa’ Dummineco) — ’O ccafè è fatto. (Toglie la caffettiera dal fuoco).

Dummineco (si alza fissandola: nello sguardo buono di lei, crede di trovare i segni di un certo incoraggiamento. Più sollevato di spirito, esce sull’arenile e si volge agli uomini che, nello scorgerlo, fanno per disporsi in tutta fretta intorno all’ultima barca, e dice loro) — Guè, lassate lloco, veniteve a piglia’ na tazzulella ’e cafè. (Rientra nella baracca e fissa ancora Catarina che lo guarda e abbassa gli occhi, intenta a preparare quattro tazzine che sono diverse l’una dall’altra).

I pescatori (entrano nella baracca con varie frasi cerimoniose e si dispongono allineati per sorbire il caffe).

Gennarino (sberrettandosi) — Buongiorno Catari’.

Dummineco (bonario) — Mettiteve ’e ccoppole^[188].

’O turrese (silenziosamente, cava un grosso pezzo di pane dalla tasca).

Dummineco (a Catarina, alludendo alle tazze) — Falle nu poco scarze^[189]. (Agli uomini, che si guardano interdetti) Neh, nu surzo pedono^[190], pecchè nun ce abbasta pe’ tutte quante.

’O turrese — Nun ce abbasta?

Cicciariello — E nun ringrazie ’a Madonna, ca nun ce abbasta? (Sardonico) Chisto è nu tipo ’e cafè ca meno ne haie, meglio è. ’O turrese — È overo, eh? (E fa per rimettersi il pane in tasca).

Cicciariello (gli afferra la mano e agli uomini) — Gué, chisto s’era priparato pe’ se fa’ ’a zuppetella ^[191]! (Tutti ridono).

Catarina (incomincia a passare qualche tazza) — Vedite si è buono ’e zucchero…

Cicciariello — No… nu poco lasculillo è… ma po’, nun serve.

’O spasellaro (che aveva sorbito e s’era disgustato, a Gennarino, piano) – E ’a mano^[192] a Cumpa’ Dummineco che pputeva asci’?

Siccetella — Fosse almeno caverò^[193]…

’O turrese — L’ha fatto cu ll’acqua ca sciacquaie^[194] ’e tazze ’a semmana^[195] passata.

Dummineco (che è stato servito per ultimo, a Catarina, sputando la bevanda) — Ma pecché è accussi?

Catarina — È accussi pecché… (Non sa continuare).

Cicciariello (per trarla d’impaccio; ma freddo) — …visto ca nun abbastava pe’ tutte quante, l’aggio allungato io cu nu poco d’acqua.

Gennarino (sorridendo, sottovoce agli altri) — Nu poco?

Dummineco (seccato) — Ce vulessero ’e schiaffe?

Cicciariello (minaccioso) — E si ce vulessero, chi me l’avess’a da’?

Dummineco — T’e ddongo io! (Fa per slanciarsi su Cicciariello).

Catarina — No! (E guarda il patrigno che si rabbonisce).

Cicciariello (che era stato trattenuto dagli uomini, contenendosi a stento) — Pigliateve ’o ccafè… Pigliateve ’o ccafè… ca chesto ve calma ’e nierve!

Cient’anne — Ah!!! (E a cumpa’ Dummineco che fissa ancora Cicciariello) Ce avimmo fatto ’a croce?!

Dummineco (quasi sereno, con un lievo sorriso sulle labbra) — Ma comme chillo m’ha fatto offri’ na tazza ’e purcaria…^[196]

Cicciariello — E ve pigliate collera vuie?

’O spasellaro (volgendo a risata la cosa) — Ce avimm’a piglia’ collera nuie ca nun avimmo avuto niente!

Capitone Eh! (Anche gli altri approvano).

Cuncetta (entrando dal lato sinistro della baracca) — Ch’è stato? (È una donna ancora giovane, che mostra velleità di ricercatezza).

I pescatori (sberrettandosi) — Buongiorno, padro’.

Cuncetta (rispondendo a tutti con un cenno della testa) — Buongiorno. (Quindi al marito) Ve sto sentenno ’a dinto^[197], che accumminciate d’ ’a matina…

Dummineco (contenendosi a stento) — E quanno figlieto è na carogna! Pe’ fforza se vò tuzza’ cu mmico^[198]! Cuncetta (al marito, amalgamando) — E va buono, chillo se credeva ’e fa’ na cosa bbona, e ha sgarrato nu poco ’a mano.

Dummineco (scattando) — Ha sgarrato nu poco ’a mano^[199]? Chille (mostra gli uomini) hanno avuto na tazzulella d’acqua! (E mostra la sua tazza, a conferma di quanto dice).

Cicciariello – Comme si avessero avuto na tazzulella ’e veleno!

Dummineco — E tu ’e vvulive avvelena’?

’O turrese (ai compagni, che si guardano) – E chesto ce mancava!

Cicciariello — E va buo’, acqua è! So’ marenare: ne vedono tanta, d’’a matina ’a sera. Mo pe’ na tazzulella ’e cchiù, è fernuto o munno?!

Cuncetta (al marito che guarda male il figliastro) – O vi? Quanno chillo nun conchiude… È guaglione, s’ha dda cumpati’^[200].

Catarina (al patrigno) — Aggiatece pacienza^[201]. Chillo accussi è, cu chi v’’a vulite piglia’? (Lo guarda).

Dummineco (calmandosi) — M’ha fatto fa’ chesta bella figura…

I pescatori (protestano come dire: non è il caso) – Eh!

Cicciariello — Comme si chille fossero ggente ’e riguardo.

’O spasellaro — Nuie nun ghiammo niente^[202]!

’O puzzulano (viene dal mare ed entra nella baracca togliendosi il berretto) – Buongiorno.

Cicciariello (mentre cumpa’ Dummineco rimane pensieroso, alla sorella) — Chisto, cafè nun ha avuto. Miette ’o ccafè^[203].

’O puzzulano (mettendo la mano al berretto) — Grazie.

Catarina (al fratello) – Cicciarie’, ferniscela^[204]!

’O puzzulano (a cumpa’Dummineco) – Padro’, ce avimm’a movere: sta scennenno nu poco ’e punente frisco; ’e vvarche attraccate se tozzano; si mollo ’e ccimme^[205], ’o mare s’’e pporta…

Dummineco (dopo una pausa, agli uomini) – Scenniteve^[206] chell’ata varca (indica fuori) e ghiatevenne^[207] vuie… Stanotte nun me sento ’e i’ a mmare. (Gli uomini si guardano fra loro, sorpresi e sospettosi).

Cuncetta (mentre Catarina fissa il patrigno, a Dummineco) – Pecché?

Dummineco — Nun me fido^[208], nun me sento buono.

Catarina — E gghiesceno^[209] ll’uommene sule?

Dummineco – Se portano a Cicciariello. Cuncetta — E Cicciariello pò maie cumanna’^[210] ’a paranza?

Dummineco (alzando la voce) — …E nun he capito ca pe’ chesto, chillo (mostra Cicciariello che lo fissa attentissimo) ce ll’have cu mmico^[211]? Chesta è l’unica ragione d’’o disaccordo! (Agli uomini, come per giustificarsi, ed intanto accusa) Dice ca io o’ sacrifico; ca io ’o faccio i’ scavezo; ca mmano ’o pato cammenava cu diciassette pare ’e scarpe e cu mme, no… È ove’^[212]? (Si volge al figliastro che non batte ciglio; quindi, di nuovo agli uomini) E allora ched è? io songo ’o tirapiede suoio? ’O vaco pe’ ddicere na parola^[213], e ’o viecchio (mostra Cient’anne) me zompa^[214] ’n faccia.

Cient’anne — E tu dice ca chillo è gghiuto sempe scavezo!

Dummineco (indispettito) - E ’mmano ’o pato nun c’è gghiuto maie e ’mmano a me ce va. E così? E dunque… Me voglio leva’ nu poco ’a miezo: voglio guarda’ nu poco. ‘O mare è accussi gruosso: c’è abbundanza pe’ tuttu quante. Ascesse, ascesse nu poco isso: songo pure interesse suoie. Vedimmo che sape fa’. Può darse ca ‘a furtuna è ‘a soia, pecché ce l’aggi’a ostacola’? Po’, del resto, na vota l’ha dda fa’? E accumminciasse ’a stanotte. (Sembra affranto, ansima).

Cuncetta (amareggiata, al figlio) — He visto pe’ causa toia, che disturbo faie veni’?

Cicciariello (con violenza alla madre) — Che vuo’? (Agli uomini) ‘O capo vuosto songh’io! (Gli uomini sono interdetti; solo ’O turrese non riesce a trattenere uno scoppio di risa che però subito soffoca ad un terribile sguardo di Cicciariello) Vuo’ vede’ ca pe’ cummanna’ ‘a paranza s’ha dda sape’ ’o latino? S’ha dda essere marenaro. E marenaro se nasce! Io fuie battezzato cu ll’acqua ’e mare. A cinche anne summuzzavo^[215], pigliavo ’o soldo cu ’a vocca^[216]. (Al patrigno) Saggia riflessione: songo interessi miei. A paranza ’a cumann’i’^[217]! (Gli uomini hanno espressioni di scarsa fiducia nelle sue capacità; ed egli grida più forte) ’A cumann’i’! (Gli uomini approvano) Jammo a buordo! (Ha nel frattempo indossata la giacca di tela cerata, e messo la berretta. Esce, seguito dagli uomini).

Cient’anne — Gué, viene ’a ccà!

Cicciariello (sull’arenile) — Ascite! Ascite! (È esuberante di fiducia in se stesso) Pigliate ’e rezze^[218] ’e cchiù grosse: chelle ’e vintotto^[219]: ca stanotte pigliammo ’a vinte cantarecantare: antica misura di peso, poco inferiore al quintale. ’alice! Dimane, a Napule, ’o pesce se jetta^[220]! ’O calmiere ’ncopp’‘a alice ’o mettimmo nuie! (Ha uno scatto verso il padrigno, come a voler rientrare nella baracca; gli uomini lo calmano, e restano a commentare l’accaduto).

Dummineco (alla moglie, masticando amaro) – Figlieto sta facenno troppo ’o capuzziello. E chi sa comme fernesce…

Cient’anne (dopo aver fissato cumpa’ Dummineco, a A sie’ Cuncetta) – Jesce fore… Chiammalo… ('A sie’ Cuncetta esce sull’arenile).

Dummineco (a Cient’anne che fa per seguirla) – Mo l’ha dda chiamma’. Mo che l’avite fatto mettere ’e scelle^[221]?

Cient’anne (torna a guardarlo, con «santa pazienza»; poi) – Acchiappalo! taglialo ’e scelle! nun ’o fa’ vula’… (E segue ’A sie’ Cuncetta sull’arenile, la quale, nel frattempo, s’è data da fare per convincere il figlio a desistere dalla sua decisione; Cicciariello è irremovibile).

Catarina (dopo una breve pausa, al patrigno che la fissa) – Pecché nun avite vuluto asci’ stanotte?

Dummineco (con ansia, dopo un attimo di silenzio) Pecché sulo all’alba te pozzo guarda’, senz’essere guardato… (Le prende la mano e gliela bacia).

Catarina – …Nun me guardate accussi, me facite paura… (Fa per ritrarre la mano, ma la stretta del patrigno s’accentua).

Dummineco – …Paura, ’e che? All’alba ’o viecchio va ’a cchiesia^[222]… Mammeta va a lava’ ’e panne ’a funtana… ’A spiaggia è deserta… Ccà dinto restammo nuie sule…

Catarina (sempre più scossa, con voce di pianto) – Io soffro… Lassateme… Io soffro…

Dummineco – Tu pe’ mme sì na necessità… (Catarina lo guarda, come affatturata) Chello che aggio fatto l’aggio fatto pe’ tte. Aggio lassato ’o cumanno^[223] d’ ’a pesca, ’e rretene d’ ’a casa^[224] pe’ tte. Nun me sento ’e te sta’ luntano… T’aggi’a vede’ tutte mumente… Tu sì ll’unico scopo d’ ’a vita mia. E si nun te sto vicino, io nun campo. (Catarina, indietreggiando esce a sinistra. Dummineco cade sul lettuccio e resta così, attonito).

Cuncetta (come continuando un discorso, al figlio) – Va’ dinto: va’ cerca scusa^[225] a pateto.

Cicciariello – Patemo? Patemo è muorto! A mariteto vuo’ dicere! Patemo? Chi ’o cunosce? Isso era buono ’e fa’ a mme^[226]?

Cient’anne – E va buo’, fernimmola^[227]…

’O spasellaro – Tu sì cchiù guaglione, e t’attocca ’e leva’^[228] ll’occasione.

Cicciariello – E pecché? Oramaie…

’O turrese – Tienece nu poco’e pacienza! Cicciariello – So’ cinche anne, ca tengo pacienza, Ferdina’, cinche!

Cuncetta (amareggiata) – ’A che m’aggio spusato a Dummineco, nun hanno fatto mai lega…

Cicciariello – ’O ssaie dicere che nun avimmo fatto maie lega?

Cuncetta – Ma pecché? che t’ha acciso quacche figlio ’a connoia^[229]?

Cicciariello (digrignando i denti) – A che trasette^[230] dint’ ’a casa, se mettette a cummanna’, a pruteggere, a dda’ mazzate… (I suoi occhi sono pieni di sangue) Cu che diritto? Nun m’ha vattuto^[231] patemo, mme vatte isso? Invece ’e se sta cu dduie piede ’nt’a na scarpa^[232], che ha truvato ’o cocco munnato e buono^[233], e s’è mmiso a spadruneggia’!

Gennarino – Ma tu mo pure ll’hé ’a capi’ ca chella puverella (mostra ’A sie’ Cuncetta) se trova mmiezo.

’O puzzulano – Tra ’a ’ncunia e ’o martiello^[234].

Siccetella – Chillo ll’è marito…

Cicciariello – E io lle so’ figlio! E lle vengo a essere quacche ccosa ’e cchiù. D’altronde, ’e rapporte nuoste so’ chine d’affezzione^[235]: isso nun me pò vede’, io nun ’o pozzo alliggeri’^[236]; sta storia avev’a ferni’ na vota? e fernesce stanotte. ’A decisione l’ha pigliata isso, è ove’? Vò dicere ca s’è fatto cuscienza!

Cuncetta – Ma comme ’a cumanne tu, sta paranza?

Cicciariello – Oje ma’^[237], cu ’a vocca e cu’a capa^[238]! Che vvuo’? Io tengo vinticinche anne: ’a barracca è do nonno, ’e vvarche e tutte mestiere songo ’e patemo, e ’o cummercio è d’ ’e figlie. Isso, dint’a l’industria nosta, nun c’entra: isso t’è sulamente marito: è venuto, ha aizato ’a coscia e s’è cuccato^[239]. Io, io cuntinuo ’o mestiero ’e patemo sott’’a guida d’’o nonno. (E si sberretta) È muorto patemo? ’O capo d’’a casa songh’io!

Cient’anne (che si è man mano esaltato allo spirito maschio del nipote, tirandogli un bacio) – Tie’, puozze campa’ cchiù ’e me! (Anche gli uomini guardano Cicciariello ammirati).

Cicciariello (alla madre che è rimasta avvilita) –Ma ’e che te miette appaura? ca nun te dà a mangia’ isso? Te dongo a mangia’ io! Se levasse ’a miezo, se mettesse a guarda’, facesse chello che vvò, ma ’n cunto a ffa’ ’o patemo sicondo^[240], no! Ma’, quanno se tenene ‘e figlie gruosse, na femmena nun s’ha dda mmareta’ cchiu! Te l’hê vuluto piglia’? E cunsolate! (Agli uomini) Gué! Jammo a scennere sta varca! (E va verso il mare con aria spavalda).

Dummineco (dalla vetrata ha seguito la scena; e l’ha seguita anche Catarina che era rientrata da qualche minuto. A lei, ricordandole la sua frase, con amarezza) — «E chisto è ’o bbene ca vulite a mammà?». ’O vi? Mammeta s ’o ffa vule’ ’o bbene, pe’ comme fa rispetta’ ’o marito a nu pulicenelluzzo^[241] simile! (Guarda ancora fuori) S’è miso a ffa’ ’o Rinaldo! (Torvo, come soffocando un rimorso) Chello che sta pe’ succedere, ce l’hanno vuluto lloro! (Catarina si allontana da lui, rimane in un angolo, tremante).

’O spasellaro (che con gli uomini appare indeciso) — Padro’ (a Cuncetta), che avimma’a fa’?

Cuncetta (sospirando) — Jatevenne. A maritemo cerco d’’o calma’ io. (S’avvia alla baracca).

’O spasellaro (a Cient’anne che s’avvia anche lui) — Zi’ Austi’, che avimm’a fa’?

Cient’anne — Jatevenne! jatevenne! (Come dire: state tranquilli, ed entra nella baracca).

Cuncetta (al marito, dolce) — T’ ’o mmetto a ffa’ frisco nu poco ’e cafè?

Dummineco (secco) — No. (‘A sie’ Cuncetta esce a sinistra, mentre Cient’anne va a sedere sulla sua sedia, in silenzio, guardando Dummineco).

’O puzzulano (agli altri pescatori) — Neh, gué, e muvimmece^[242]…

’O turrese (cogitabondo) — E avota avota^[243] ’o cetrulo…

’O puzzulano — Ch’è stato?

’O turrese — …avimmo passato nuie ’o guaio!

Capitone — Pecché?.

’O spasellaro (agli altri, mostrando ’O turrese, come dire: È il solito malaugurio) — ’O vi lloco^[244], ’o vi…

’O turrese (giustificando il suo malumore) — Ma ve pare ca cumpa’ Dummineco, chillu maganzese^[245], overo mette tutto cosa mmano ‘o figliasto? L’avrà ditto stanotte ca se murarrà ’e suonno: ma, dimane, ’o piglia a cavice^[246] e n’’o caccia… E po’ce caccia pure a nnuie…

Siccetella — Mo accummencia a mmena’ ’o nniro d’’a seccia^[247]!

’O spasellaro — Ma che ce trasimmo nuie ’mmiez’’a fatte lloro!? (Ed indica la baracca).

Pilo ’e purpo — Nuie simmo cummannate! ’O turrese — ‘A chi? Nuie dipendimmo ’a cumpa’ Dummineco, e comme rregula, nun ce avessem’a movere.

Gennarino (gli grida all’orecchio) — Ma ’o padrone, he ’ntiso^[248]? è Cicciariello!

Capitone — L’ha dichiarato ’n presenza ’o padrigno stesso…

’O puzzulano — …’n presenza ’o viecchio…

PILO ‘E PURPO — …‘n presenza ’a mamma…

Siccetella —… n presenza nosta…

’O spasellaro (ricordando la frase di Cicciariello) — «O capo vuosto songh’io!».

Temmone — …e nisciuno ha truvato difficultà…

’O turrese — ‘O saccio.

Gennarino - E allora?

’O turrese — Ma ccà, chi cumanna ’a barracca, è sempe cumpa’ Dummineco. È si ce avutammo ’a parte^[249] ’e Cicciariello, cumpa’ Dummineco ce ne caccia!

Siccetella — E allora avutammece ‘a parte ’e cumpa’ Dummineco…

’O turrese — E po’ ce ne caccia Cicciariello!

’O spasellaro (scattando) — Insomma; afforza’mmiez’a na via avimm’a i’ a ferni’^[250] e nun ne parlammo cchiù!

Dummineco (che aveva notato il confabulare degli uomini, mostrandosi sull’arenile) — Che state cungiuranno vuie?

’O spasellaro (piegandosi nelle spalle) — Niente, padro’: stammo vedenno chi ce n’ha dda caccia’. (Qualcuno dei pescatori ride, gli altri sbuffano).

Gennarino — Putimmo asci’?

Dummineco (freddo) — A mme ’o ddicite? Spiatencello^[251] o capopesca! (Rientra nella baracca e rimane sotto la porta).

’O turrese (chiama a raccolta i pescatori e dice loro con tono circospetto) — E comme dich’io?

Siccetella — Beh?

’O turrese — Ccà o ce ne caccia cumpa’ Dummineco o ce ne caccia Cicciariello! (Gli uomini scattano contro di lui).

’O spasellaro — Uh! ca overo sì na ciucciuvettola^[252]! (’O turrese tenta ancora di giustificarsi, ma gl altri lo soverchiano).

Cuncetta (entra da sinistra, con un grosso involto di panni sotto il braccio e prende la via della porta).

Catarina (preoccupata) — Ma’, te ne vaie?

Cuncetta — Me vaco a llava’^[253] sti duie panne sott’’a funtana.

Catarina — Vengo pur’io? Si, si… vengo pur’io… (Il patrigno la guarda ed ella s’ammutolisce). Cuncetta (alla figlia) — E ccà po’, chi resta…? ’O nonno mo se ne va, rummanimmo^[254] a pateto sulo? È nata pure sta quistione… Io quanto pozzo trica’^[255]? Patrìeto mo, giustamente, sta dato ’o diavolo^[256]: tenimmece nu poco ‘e maniera. (Al marito) Mme vaco a ffa’ sti duie panne.

Dummineco — Va’.

Cuncetta (mette l’involto sul capo; guarda la figlia che è rimasta male; crede che sia per non averla portata con sé. Al marito) — Che faie tu, m’aspiette? Pecché, si jesce, io chiudo ’a barracca, e mm’’a porto a Catarina.

Dummineco (senza guardarla) — Nun vaco a nisciuna parte. (Entra nel vano di sinistra).

Cuncetta (a Catarina che la guarda supplichevole, come dirle: non mi lasciare, rassicurandola) — Primma ‘e fa’ juorno, sto cca’. (Esce sull’arenile; agli uomini, sorpresa) Neh, vuie state ancora lloco? A chi aspettate?

’O turrese — …Putimmo asci’?

Cuncetta — E quanno…? (Ridendo suo malgrado, si allontana a sinistra e scompare dietro la baracca).

Cicciariello (dal mare, verso i pescatori) — Neh, gué, ve muvite o no?!

Gennarino (verso quella voce) — ‘O turrese nun vò asci’!

’O turrese (scattando, afferra un remo ed insegue i compagni che lo burlano, gridando) — Embè, io nun accido^[257] a uno ’e vuie? (Escono tutti i pescatori; le loro voci si allontanano fino a spegnersi).

Dummineco (dall’interno del vano di sinistra della baracca) — Catari’…

Catarina (si scuote. Frattanto Cient’anne s’è messo la sua vecchia beretta; la ragazza sì rivolge a lui con ansia) -O no’…^[258] Ve ne jate pure vuie?

Cient’anne — …E che ce faccio, ccà? Me vaco a sentere ’a primma Messa. Apparecchio l’anema a Ddio^[259].

Dummineco (come sopra) — Catari’…

Cient’anne (mostrando il vano di sinistra, con una risatina sardonica) — Va’, va’… Chillo mo sa’ comme sta ammulato^[260]? Io me ne vaco, io… spuzzuliatillo tu^[261]!

Catarina (con voce di preghiera) — ’O no’, raccumannateme^[262] a chella bella Madonna d’’a Catena^[263]! Essa me pozza scanza^[264]!

Dummineco (come sopra, sempre più forte) — Catari’!

Catarina (con accento tremulo) — Vengo. (E non si muove).

Cient’anne — Va’ vide che lle manca. Catarina (con improvviso scatto) — ’O no’, chiammateme a Cicciariello, facitelo veni’ ccà. (Cient’anne approva con un cenno del capo e si allontana dalla porta, per raggiungere l’arenile).

Dummineco (vien fuori adirato, trova Catarina sola, si frena, la fissa, la rimprovera) — T’aggio chiammato tre vvote! (Avvicinandosi a lei di qualche passo) Stamme sule?

Catarina (guarda verso il mare e si scosta) — No.

Cicciariello (viene dal mare, precedendo gli uomini, ed incitandoli) — Jammò, ca chesta è ll’ultima… (Mostra la barca).

Cient’anne (avvicinandosi a lui) — Cicciarie’, va’ dinto, te vò Catarina.

Cicciariello — Ve ne jate a Messa?

Cient’anne — Sí.

Cicciariello — E dateme nu vaso^[265] (Lo abbraccia. Il vecchio si allontana a sinistra, scomparendo dietro la baracca, mentre il giovane entra nel chiuso, passando davanti a cumpa’ Dummineco, che e sulla soglia e cercando di schivarlo; entra nel vano di sinistra).

I pescatori (calando a mare l’ultima barca) — Oh! tira! Oh! venga! (Le voci si allontanano).

Dummineco (guarda assorto lo scomparire degli uomini, fissa Catarina e va fuori la baracca).

Cicciariello (esce da sinistra con la giacca e con le scarpe in mano. A Catarina) — M’aggio pigliato ’e scarpe soie… Cheste, m’’e consumo io. (Le infila) ’O capopesca nun ha dda i’ scavezo! (Stacca i berretto da un chiodo infisso alla parete e fa per uscire; poi come ricordandosi: a Catarina) Pecché m’hé mannato a chiamma?’?

Catarina (con un filo di voce, supplichevole) — Cicciarie’, nun asci’, stanotte.

Cicciariello — Pecché?

Catarina (insistendo) — Nun asci’!

Cicciariello — Ma pecché? Pe’ vvia ’e^[266] patrìemo?

Catarina — Sí…

Cicciariello — Chillo nun è buono a ffa’ niente.

Catarina — Siente a soreta: nun asci’.

Cicciariello — Ma ’e che te miette appaura? Chillo è tutto vocca^[267].

Catarina — No! Tu nun t’hè ’a movere ‘a ccà!

Cicciariello (scattando) — Ma si nun ’o coglio^[268] stu mumento, quanno ’o faccio ’o cumandante?

Catarina (disperandosi) — Chillo… nun ha vulito i’^[269] a mmare stanotte pecché…

Cicciariello — Pecché? Pe’ mezza mia?

Catarina — No…

Cicciariello — Pecché ce sta maretto^[270]?

Catarina — No…

Cicciariello — E allora, pecché? (Catarina non osa parlare) T’ o ddico io, ‘o ppecché: l’ha fatto pe’ vede’ io che sso’ buono ‘e fa’! E io ce ’o ffaccio vede’! (Fa per uscire risolutamente dalla baracca).

Catarina (afferrandolo per un braccio) — Cicciarie’!

Cicciariello — Lasseme^[271]! (Ed esce con violenza sull’arenile, gridando verso il mare, ma come all’indirizzo del patrigno) Voca fore! Voca fore! (Scompare).

Catarina (con un singhiozzo, quasi cadendo su se stessa) — Cicciarie’…

I pescatori (in lontananza) — Oh! tira! Oh! venga!

Dummineco (ha seguito con lo sguardo il figliastro; ora, a lenti passi, si avvia alla baracca, vi entra. Catarina, nel vederlo sulla soglia, dà un piccolo grido e fugge nel vano di sinistra, chiudendosi la porta alle spalle. Il patrigno è stato però più lesto: prima che la ragazza riesca a sprangare l’uscio, lo forza, gridando con voce soffocata) — Arape…

Catarina (da dentro) — Facitelo pe’ Ddio! Jatevenne!

Dummineco — Arape… Nun te faccio niente.

Catarina — Vene mammà…

Dummineco — Nun vene manco Ddio! Arape… (La porta cede, la ragazza è afferrata dal patrigno che la stringe a sé, con violenza).

Catarina (mormora) — Vuie m’arruvinate^[272]…

Dummineco (la spinge verso l’interno, prendendola quasi di peso e mormorandole all’orecchio) — Sì dd’’a mia^[273]… Sì dd’’a mia… (Nello stesso tempo)

Musica

Cicciariello (in lontananza, fra il coro delle voci dei pescatori, canta con allegrezza)

E vuzze d’’o ssicco, cu ll’uommene attuorno,

cu «Oh! tira!» e cu «Oh! venga!» se scenneno a mmare.

I pescatori — Oh! tira! Oh! venga!

FINE DEL PRIMO ATTO

Nutarelle

1. ’O spasellaro: chi si prende cura delle spaselle. La spasella del pesce è un canestro per deporvi il pesce, di forma bislunga e piccola (Gr.).
2. Temmone: timone.
3. Ciceniello: piccolo pesce. Così detti vengono i piccoli di questa specie ancor mancante di squame: confondendovi però pure quelli di altri generi.
4. sceta: sveglia.
5. turmiento: tormento, ansia.
6. arreposa: riposa.
7. saglie. sale.
8. resta’: rimanere.
9. vuzzo: gozzo, battello da pesca.
10. m’aggi’a: mi devo.
11. fore: fuori.
12. int’all’onne: tra le onde.
13. vuca: vogare, remare.
14. assetta’: sedere.
15. sunna’: sognare.
16. Accumminciammoce a movere!: cominciamo a muoverci!
17. m’arricorda: mi ricorda.
18. l’accacciaie: la inventò.
19. saccio: so.
20. a ’mmentaieno: la inventarono.
21. faticato: lavorato.
22. mise: mesi.
23. paranza: grossa barca a vela.
24. nepotema: mia nipote.
25. starrie. starei.
26. piscarrie. pescherei.
27. tanno: allora, a quel tempo.
28. ’O puzzulano: chi è nativo di Pozzuoli.
29. ’O turrese: chi è nativo di Torre del Greco.
30. Chillo: quello.
31. vvò: vuole.
32. malaurio: cattivo augurio.
33. Che m’ ’o spiate a ffa’. che me lo domandate a fare! (perché mai me lo domandate).
34. Zi’ Austi’: zio Agostino.
35. Cient’anne: Cent’anni.
36. buonaurio: buon augurio.
37. campa’: vivere.
38. aggi’a muri'?: devo morire?
39. dongo: dò.
40. susite: alzate (dal letto).
41. scetate: svegliate.
42. si avissev’a i’ a pisca’: se doveste andare a pescare.
43. arrepusato: riposato.
44. ll’uocchie: gli occhi.
45. E dalle!: e dagli! (rivolto a chi insiste sulla stessa richiesta).
46. ’A bunettanema: la buonanima.
47. se magnaie: mangiò
48. patemo: mio padre.
49. ’acchiara: gli occhiali.
50. arrepezzava ’a rezza: rattoppava la rete da pesca.
51. vuosto: vostro.
52. Ati uommene: altri uomini.
53. me ’nzuraie: mi sposai.
54. cunuscette ’o munno: conobbi il mondo.
55. bardasce: ragazzi, giovinetti.
56. Facitevene nu vanto!: fatevene un vanto, vantatevene!
57. se tiravano ’e cazune cu ’e tterocciole: si tiravano su i pantaloni con la carrucola (per dire che si era impacciati, inetti).
58. ’a mmità: la metà.
59. Siccetella: dim. di seccia, seppia.
60. Cumpa’ Dummi’: compare Domenico.
61. è asciuto a purpe: è uscito a pescare polpi.
62. Pilo ’e purpo: pelo di polpo (appellativo scherzoso).
63. S’ ’a custruette cu ’e mmane soie: se la costruì con le proprie mani.
64. custaie: costò.
65. vinte ducate: venti ducati. Il ducato è un’antica moneta del valore di lire quattro e venticinque centesimi.
66. abbascio: abbasso; giù.
67. Santa Lucia vecchia: l’antico insediamento di Santa Lucia, che, alla fine del secolo scorso, fu limitato al Borgo Marinari per la costruzione di alberghi e palazzi di lusso.
68. ’a muntaiemo: la montammo.
69. fravécano: costruiscono.
70. a gghi’ fore: ad andar fuori.
71. ’n terr’arena: sulla spiaggia.
72. ch’aizano: che alzano.
73. ve jetteno a mmare!: vi gettano a mare!
74. Va’ vide: va’ a vedere.
75. ’e figliastemo: del mio figliastro.
76. susuto: alzato (dal letto).
77. ’O sceto?: lo sveglio?
78. Lassa sta’: lascia stare.
79. nu cato: un secchio.
80. ’o vi: lo vedi.
81. Lievelo: toglilo.
82. ‘a cammarella: la cameretta.
83. Vicienzo…: Vincenzo.
84. me n’avarrie: mi avrebbe.
85. lassaie: lascio.
86. nun ce po penza’: non ci può pensare (modo di dire tipico per indicare un ricordo spiacevole)
87. le veneno a essere: sono per lui.
88. trasi’ entrare.
89. Vriogna!: vergogna!
90. se ’mmarita: prende marito, si sposa.
91. purcaria: porcheria, cattiva azione.
92. mme lieve: mi togli.
93. scurda’: dimenticare.
94. rummanette: rimase.
95. gruosse…: grandi.
96. nun se turnava a ’mmareta’: non si sarebbe risposata.
97. Che staie murmurianno?: che stai borbottando?
98. calanno ’e vvarche a mmare: calando le barche a mare.
99. scetate ca è gghiuorno: svegliati che è giorno!
100. che bell’ebbeca!: che bell’epoca!
101. apprimma: prima.
102. ’e scoppole: i colpi sul capo con la mano aperta.
103. Ajere: ieri.
104. addeventaie: diventò.
105. putarrieno: potrebbero.
106. scassata: sgangherata, rotta.
107. chiammate: chiama (a te).
108. scarfate: riscaldati.
109. Cevetta: civetta.
110. Te se pozza secca’ ‘a lengua!: ti si possa seccare la lingua!
111. Nono’: nonno.
112. sceta a frateto: sveglia tuo fratello.
113. Patrìeto: il tuo patrigno.
114. ’o ssaie: lo sai.
115. scarfancella: riscaldagliela.
116. tazzulella: tazzina.
117. Meh, ’e ssiente?: orsù, li senti?
118. fanc’ ’e mmettere: fagliele mettere.
119. Viestete. vestiti.
120. Lassa lloco: lascia là.
121. pato: padre.
122. sparte: divide.
123. vogl’i’: voglio andare.
124. Fatico: lavoro.
125. paro: paio.
126. avett’a asci’. dovetti uscire.
127. scavezo e scaruso: scalzo e senza cappello.
128. n’atu ppucurillo: ancora per un po’ di tempo.
129. Aggiu: abbi.
130. allucca: strilla.
131. E vuzze d’ ’o ssicco: i gozzi che sono a secco, cioè tirati sulla spiaggia.
132. se scenneno: si fanno scendere.
133. buordo: bordo.
134. vuganno: remando.
135. triemmolo: tremolio.
136. guaglione. giovanotto.
137. se spassa: si diverte.
138. chiano: piano.
139. sciato: fiato, respiro.
140. rimmo: remo.
141. stracquato: stancato, spossato.
142. ’e panne ’nzuppate: i vestiti inzuppati.
143. ll’ummedità: umidità.
144. a vvacante: senza carico, vuoto. Cioè: non si è pescato nulla
145. asciutta’: asciugare.
146. sosuti: alzati (dal letto).
147. allustri’: lustrare, lucidare.
148. ’e stivalette ’e pelle ’e pede: per dire che la pelle dei piedi sostituisce gli stivaletti, cioè le scarpe.
149. Mmano a vvuie, si: da quando sono con voi, si.
150. pare: paia.
151. ’o scarparo: il calzolaio.
152. difiette: difetti.
153. capuzziello: arrogante, prepotente;
154. ferni’: finire.
155. perzune. persone.
156. Avarriano asci’ a cca: dovrebbero uscire da qua.
157. lasculillo: poco forte, assai acquoso.
158. ’e nierve: ai nervi.
159. sti cchianelle: queste ceste. La chianella è un «arnese fatto di piccole strisce di legno, nel quale i pescivendoli portan vendendo per la città i pesci» (Pu).
160. Jammo!: andiamo!
161. carreca: carica, ristretta.
162. ve dongo: vi do.
163. cunziglio: consiglio.
164. ll’avit’a ferni’!: dovete smetterla!
165. che ssaccio…: che ne so.
166. freva: febbre.
167. te vaco scanzanno: cerco di evitarti.
168. m’ha ’nchiuvato: mi ha inchiodato. Mi ha bloccato con argomenti inoppugnabili.
169. è nu muorzo: è un morso, è piccola.
170. me scanzo: mi scanso.
171. te tozzo: ti urto.
172. V’aggiu ’ntiso: vi ho sentito.
173. a ffa’ ’o palummaro: a fare il palombaro.
174. sciato: fiato. Qui: possibilità di trattenere il respiro per parecchio tempo.
175. cala’: calare, abbassare.
176. bunaccia: bonaccia.
177. ascite a nnomme ’e Sant’Antonio: uscite in nome (cioè con la protezione di Sant’ Antonio).
178. ’e cavallune: i cavalloni.
179. buatta: scatola di latta. Qui: non sei capace di pigliare le alici nemmeno quando sono in scatola.
180. ’e nata’: a nuotare.
181. arape ’a vocca: apri la bocca. Potrai parlare.
182. ’e cacciuttielle…: i cagnolini.
183. scuorno: vergogna.
184. curto e chiatto: basso e grasso.
185. Io faccio o bargio: io faccio come il bargio.
186. pe’vvia d’ ’a panza: a causa della pancia.
187. L’hann’a rimurchia’: lo devono rimorchiare.
188. ’e ccoppole: le coppole, i berretti.
189. Falle nu poco scarze: falle (di contenuto) un po’ scarso.
190. nu surzo pedono: un sorso per ciascuno.
191. ’a zuppetella: la zuppetta.
192. ’a mano a: da, dalle mani.
193. caverò: caldo.
194. sciacquaie risciacquò.
195. semmana: settimana.
196. ’e purcaria: di porcheria, intruglio.
197. ’a dinto: da dentro.
198. tuzza’ cu mmico: urtare, scontrarsi con me.
199. ha sgarrato… ’a mano: ha sbagliato un poco con la mano (ed ha messo più acqua).
200. cumpati’: compatire, comprendere, giustificare.
201. Aggiatece pacienza: abbiate pazienza.
202. nun ghiammo niente!: non valiamo niente!
203. Miette ’o ccafè: metti, versa il caffè.
204. ferniscela: smettila.
205. si mollo ’e ccimme: se allento le cime.
206. Scenniteve: scendete, voi stessi.
207. ghiatevenne: andatevene.
208. Nun me fido: non mi sento bene.
209. gghiesceno: escono.
210. cumanna’: comandare.
211. ce ll’have cu mmico: ce l’ha con me.
212. È ove’: è vero.
213. ’O vaco pe’ ddicere na parola: vado per dirgli una parola; cerco di parlargli.
214. me zompa: mi salta.
215. summuzzavo: nuotavo sott’acqua.
216. pigliavo ’o soldo cu ’a vocca: riuscivo a prendere con la bocca una moneta di metallo, nuotando sott’acqua. Era tipica acrobazia degli «scugnizzi» di Santa Lucia.
217. ’a cumann’i’: la comando io.
218. ‘e rezze: le reti.
219. chelle ‘e vintotto: il riferimento è alla dimensione della rete.
220. se jetta: si butta, sarà abbondante.
221. mettere ’e scelle: mettere le ali, montare in superbia.
222. va’ ’a cchiesia: va in chiesa.
223. aggio lassato ’o cumanno: ho lascialo il comando.
224. ’e rretene d’ ’a casa: le redini della casa.
225. va cerca scusa: va a chiedere scusa.
226. Isso era buono ’e fa’a mme?: egli era capace di generarmi?
227. fernimmola: finiamola.
228. t’attocca ’e leva’: ti spetta di togliere.
229. t’ha acciso quacche figlio ’a connoia?: ti ha ucciso qualche figlio nella culla? Ti ha arrecato un grave torto?
230. 'A che trasette: da quando è entrato.
231. vattuto: battuto.
232. sta cu dduie piede ’nt’a na scarpa: stare con due piedi in una scarpa. Stare al suo posto educatamente.
233. ha truvato ’o cocco munnato e buono: ha trovato l’uovo sodo già sgusciato; ha trovato i vantaggi senza alcuna fatica.
234. Tra ’a ncunia e ’o martiello: tra l’incudine e il martello.
235. so’ chine d’affezione: sono pieni di affetto.
236. nun ’o pozzo alliggeri': non lo posso digerire.
237. Qje ma: oh, mamma.
238. cu ’a vocca e cu ’a capa: con la bocca e con la testa (l’intelligenza).
239. ha aizato ’a coscia e s’è cuccato: ha approfittato di una favorevole situazione preesistente.
240. ’n cunto affa’o patemo sicondo: in quanto a fare il mio secondo padre.
241. pulicenelluzzo: uomo senza carattere, buffone (da Pulcinella).
242. muvimmece: muoviamoci.
243. avota avota: gira e rigira.
244. ’O vi lloco: eccolo.
245. maganzese: traditore per antonomasia. Il riferimento è a Gano di Maganza nemico di Carlo Magno.
246. ’o piglia a cavice: lo prende a calci.
247. accummencia a mmena’ ’o nniro d’‘a seccia: incomincia a spandere il nero della seppia; ad intorbidare l’acqua.
248. he ’ntiso: hai inteso.
249. si ce avutammo a parte: se passiamo dalla parte.
250. avimm’a i’ a ferni: dobbiamo andare a finire.
251. Spiatencello: domandatelo.
252. ciucciuvettola: civetta, malaugurio.
253. Me vaco a llava’: mi vado a lavare.
254. rummanimmo: lasciamo.
255. quanto pozzo trica’: quanto posso tardare.
256. sta dato ’o diavolo: dato al diavolo; è fuori di sé.
257. accido: uccido.
258. ’O no’: nonno.
259. Apparecchio l’anema a Ddio: preparo l’anima a Dio.
260. ammulato: arrotato, affilato come un coltello. (Chi è pronto ad accattar briga).
261. spuzzuliatillo tu: piluccatelo tu! Occupati tu della cosa!
262. raccumannateme: raccomandatemi.
263. Madonna da’ ’a Catena: Madonna della Catena.
264. me pozza scanza’: mi possa salvare.
265. nu vaso: un bacio.
266. Pe’ vvia ’e: per causa di.
267. è tutto vocca: è tutto bocca, parla soltanto.
268. nun ’o coglio: non approfitto di.
269. vulito i’: voluto andare.
270. maretto: maretta.
271. Lasseme: lasciami.
272. m’arruvinate: mi rovinate.
273. Sì dd’’a mia: sei mia, appartieni a me.